АҚШ Конгресси вакиллар палатаси спикери Нэнси Пелоси CNN телеканали эфирида COVID-19 коронавирус инфекциясини «Трамп вируси» деб атади ва Америка президентини пандемия шароитида ҳаракатсизликда айблади.

«Менимча, бугунги чиқишда президент ниқоб тақиш муҳимлигини таъкидлаб, ўз хатосини тан олди», — деган Пелоси Трампнинг гапига жавобан.

Бундан ташқари, Пелосининг сўзларига кўра, Трамп инфекция тарқалиши шароитида вақтида зарур чораларни кўрмади. «Афтидан, бу Трамп вируси эканлиги аён», — деган у.

Пелосининг қўшимча қилишича, Трампнинг пандемия ҳақидаги гаплари, шунингдек, унинг ниқоб тақишни бошлагани ўз хатосини тан олганидан далолат беради. «Биз бошимиздан ўтказган нарсалар муайян даражада Трамп вируси», — деган у.

Эслатиб ўтамиз, Дональд Трамп бир неча бор коронавирус инфекциясидан ҳимояланиш учун ниқоб тақиш ниятида эмаслигини маълум қилган. Хусусан, апрель ойида АҚШ президенти аҳолига ниқоб тақишни тавсия қилиб, ўзи бу тавсияга амал қилмаслигини айтган эди. Ўшанда Трамп кейинчалик ўз фикрини ўзгартириши мумкинлигини ҳам таъкидлаб ўтганди. Май ойида эса Трамп коронавирус пандемияси вақтида ҳеч кимга яқинлашмаётгани сабаб тиббий ниқоб тақишга эҳтиёж сезмаётганини билдирган. 11—12 июль кунлари Трамп Walter Reed ҳарбий госпиталига ташрифи давомида ниқоб тақишга ваъда берди ва шу куни омма олдида биринчи марта ниқоб таққан ҳолда кўриниш берди.