Россиянинг Амур вилоятидаги газни қайта ишлаш заводида норозилик билдирган ўзбекистонлик ишчиларга моддий кўмак таклиф қилинди

Россиянинг Амур вилояти гурбернатори Василий Орлов Renaissance Heavy Industries пудратчи компанияси вакиллари ҳамда Амур газни қайта ишлаш заводи қурувчилари ўртасидаги тўқнашувдан кейин ишчиларга турли шаклдаги ёрдамлар таклиф қилинганини билдирди. Бу ҳақда «РИА Новости» хабар қилган.

«Россия 24» телеканалида эфирга берилган видеода завод ҳудудидаги ишчилар исён кўтаргани, завод ошхонаси ва ҳовлисидаги бошқа биноларга зарар етказгани, ҳуқуқ-тартибот идоралари ходимларига фаол қаршилик кўрсатгани ҳамда машиналарни ағдариб ташлагани акс этган.

Мазкур ҳолатлар юзасидан Амур вилояти прокуратураси томонидан Россия қонунчилигига мувофиқ «Безорилик» ҳамда «Оммавий тартибсизликлар» моддалари бўйича жиноий ишлар очилгани хабар қилинганди. Пудратчи компания ҳамда ўзбекистонлик қурувчилар ўртасидаги ихтилофга меҳнат патентини тўлаш масаласининг ҳал этилмагани сабаб бўлган. «Россия 24» телеканалининг хабар беришича, қурувчилар уч ойлик карантин даври учун маош тўланишини талаб қилган.

Орлов 13 июль куни заводга борган ва ишчилар билан учрашган, завод ҳудудида компания раҳбарлари, қурувчилар етакчилари, ҳуқуқ тартибот ва назорат органлари ходимлари иштирокида учрашув ўтказилган.

«Ишчиларга иқтисодий томондан кўмак таклиф қилинди. Ушбу маблағ ичига карантин давридаги компенсация пули ва вахтада олти ой ва ундан кўпроқ бўлганларга бир марталик маош миқдоридаги тўлов ҳам киритилган. Renaissance Heavy Industries компанияси ушбу чоралар кўрилишига кафил бўлган. Пандемия даврида ишчиларни ҳар томонлама қўллаб-қувватлаш масаласи ўткир муаммо ва қурувчиларда чарчоқ мавжуд. Биз мазкур муаммога яқин орада барҳам берилишига умид қиламиз», — дея Орлов сўзларини келтирган «РИА Новости».

Қайд этилишича, қурилиш майдончасидаги асосий ишлар тегишли тартибда давом этмоқда ва лойиҳага, тахминан, 29 минг нафар ишчи жалб қилинган.

«Қурилиш майдонларида ҳуқуқ-тартибот идораларининг ходимлари ҳам иш фаолиятини давом эттирмоқда», — дейилади вилоят маъмуриятининг баёнотида.

Аввал Россиянинг Амур вилоятида газни қайта ишлаш заводи қурилишини амалга ошираётган Renaissance Heavy Industries компанияси ишчилари уч ой давомида маош олмаганлиги сабабли исён кўтаргани, Ўзбекистоннинг Россиядаги элчихонаси томонидан мазкур ҳолат назоратга олингани ва мазкур масала бўйича Россия Ички ишлар вазирлиги, бошқа ваколатли органлар билан мунтазам мулоқот олиб борилаётгани хабар қилинганди.