Жаҳон бозорида олтин нархи 1,4 фоизга, яъни бир унсия учун 1803 АҚШ долларига қимматлашиб, 2011 йилдан буён энг юқори кўрсаткични қайд этди. Бунга коронавирус пандемиясининг иккинчи тўлқини хавфи, АҚШ ва Хитой ўртасидаги зиддиятлар, шунингдек, ривожланган давлатлар иқтисодиётига кенг кўламли маблағлар жалб қилиниши сабаб қилиб кўрсатилмоқда, деб ёзади Spot.

2019 йилнинг охиридан бошлаб олтин нархи 20 фоиздан кўпроққа қимматлашиб, кўплаб молиявий инструмент ва индексларнинг ўсиш темпини ортда қолдирган. Бозор иштирокчилари қисқа муддатда олтин нархининг янада кўтарилишини кутмоқда.

Аввалроқ олтин захираси Ўзбекистонга пандемия вақтида «жон сақлаш»га имкон бераётгани тўғрисида хабар берилганди. Май ойининг бошида Ўзбекистон Марказий банки 2020 йил учун янгиланган прогнозини эълон қилганди. Унда кўплаб пессимистик прогнозлар билан бир қаторда, олтин борасида ижобий тахминлар келтирилган эди.

«Регулятор нархларнинг кўтарилиши давлат бюджети ва тадбиркорларнинг даромадларига ижобий таъсир қилиши ҳамда бу солиқ тушумларини камайтириш таъсирини маълум даражада юмшатишини тахмин қилмоқда», — дейилади хабарда.

Маълумот учун, 2020 йил январь—февраль ойларида Ўзбекистон 1,005 миллиард долларлик олтин экспорт қилгани, олтин мамлакатнинг бош экспорт маҳсулоти бўлишда давом этаётгани ҳақида хабар берилганди.