Вазирлар Маҳкамаси ходимида коронавирус аниқланди. Ҳукумат биноси қатъий карантинга олинди

Ўзбекистон Вазирлар Маҳкамасидаги департамент мудирларидан бирида коронавирус аниқланди. Бу ҳақдаги хабарлар аввалига ижтимоий тармоқларда тарқалди. «Дарё»нинг ҳукуматдаги манбаси ушбу маълумотни тасдиқлади.

Айни пайтда ҳукумат биноси қатъий карантинга олинган.

Бош вазир Абдулла Арипов бошчилигидаги ишчи гуруҳ 17 июнь куни Шаҳрисабз шаҳрига ташриф буюриб, 2-Халқаро Мақом фестивалига тайёргарлик жараёни билан танишган.

Видеоблогер Умид Нормуродов томонидан эълон қилинган суратларда Абдулла Арипов вирус блокатор тақиб олганини кўриш мумкин.

16 июнь куни Шавкат Мирзиёев раислигида ўтказилган видеоселекторда Президент Тошкент шаҳрида сўнгги икки ҳафтада аҳоли орасида 482 кишида коронавирус аниқлангани, 57 ҳолатда вирусни юқтириш манбаси номаълумлигини айтганди. Бу каби ҳолатлар бошқа ҳудудларда ҳам кузатилаётганини таъкидлаганди. «Агар вазият шундай давом этса, вилоятлар ва кўп шаҳарларни ёпишга мажбур бўламиз», — деганди Шавкат Мирзиёев.

Соғлиқни сақлаш вазирлиги 17 июнь соат 10:00 да коронавирусга чалиниш билан боғлиқ 68 та, соат 17:00 да 77 та янги ҳолат бўйича хабар берди. Лекин Тошкентда қайд этилган ҳолатлар ҳақида хабар берилмаганди. 145 та ҳолатнинг 135 таси карантин муассасидаги фуқаролар орасида, 6 таси Сурхондарёда ва яна 4 таси Бухорода қайд этилгани маълум қилинганди. Коронавирусга чалинган беморлар ҳақидаги маълумотлар соат 23:00 да янгиланади.

Ўзбекистонда ҳозиргача 5638 кишида коронавирус қайд этилган. Улардан 4131 нафари тузалган бўлса, 19 нафари вафот этган.