Қозоғистон 2020 йил 20 июндан бошлаб Туркия, Хитой, Жанубий Корея, Таиланд, Грузия ва Японияга халқаро рейсларни босқичма-босқич қайта тиклайди. Бу ҳақда Қозоғистон Саноат ва инфратузилмаларни ривожлантириш вазирлигига таяниб, «Kazinform» хабар берди.
Маълум қилинишича, идоралараро комиссиянинг 2020 йил 11 июндаги қарорига мувофиқ ҳамда Соғлиқни сақлаш вазирлигининг тавсияларига биноан, эпидемиологик вазиятнинг даражасини ҳисобга олган ҳолда Жаҳон соғлиқни сақлаш ташкилоти харитаси асосида 2020 йил 20 июндан бошлаб Туркия, Хитой, Жанубий Корея, Таиланд, Грузия ва Японияга халқаро рейслар аста-секин очилади.
Халқаро йўналишлар бўйича парвозлар сони авиакомпанияларнинг ҳаво транспорти бўйича мавжуд ҳукуматлараро битимлар асосида ва ҳар бир йўналишда ҳаво кемаларининг тижорат юкига қараб белгиланади. Рейслар ва чипталарни сотиш авиакомпаниялар веб-сайтларида эълон қилинган жадвалга мувофиқ, фуқароларнинг юқорида кўрсатилган давлатлар билан давлат чегараси орқали ўтишига қўйилган чекловларнинг олиб ташланиши ва Қозоғистондаги эпидемиологик вазиятнинг яхшиланишига боғлиқ равишда амалга оширилади.
Сўнгги маълумотларга кўра, Қозоғистонда коронавирусга чалинганлар сони 13 872 кишига етган. Ҳозирга қадар 8593 киши соғайган, 67 киши вирус қурбонига айланган.
Мавзуга доир: Қозоғистон ва Қирғизистон чегарасидаги барча назорат-ўтказиш пунктлари очиладиган бўлди
Изоҳ (0)