Иш самарадорлиги ошишида ёрдам берадиган 6 тавсия

Сиз қайси соҳада фаолият юритишингиздан қатъи назар, қуйидаги омиллар ишингизда самара бўлишига ёрдам бериши аниқ.

Уйқу

Уйқусиз ҳаётини тасаввур қила олмайдиганларни қувонтирадиган факт — иш жараёнида сизнинг қанчалик фаол эканингиз тўйиб ухлаш ёки ухламаслик билан боғлиқ. Тиниқиб ухлагандан кейин организм кучга тўлади ва бу бевосита сизнинг кунингиз, ҳаттоки ҳафталарингиз қандай ўтишига таъсир ўтказади. Айтилавериб сийқаси чиқиб кетган бўлса ҳам муҳимлиги учун яна бир бор такрорлаймиз — 7 соатдан кам ухламанг ва уйқуга тунги соат 22:00 га қадар ётишга ҳаракат қилинг.

Қилиниши керак бўлган муҳим вазифаларни куннинг иккинчи қисмига қолдирманг

Қийин ва мураккаб бўлган вазифаларни куннинг биринчи қисмида, кечи билан эса соат 12:00 га қадар бажаринг. Албатта, тушликдан кейин ҳам бажаришингиз мумкин, фақат бунда одатдагидан кўпроқ вақт ва энергия сарфлашингизга тўғри келади.

Катта ҳажмдаги ишларни қисмларга бўлиб бажаринг

Эрталабдан кечгача курсига қадалиб, асабий иш бажариш руҳиятингизга таъсир кўрсатади. Дейлик, катта лойиҳа устида ишлаяпсиз ва бунинг учун сизга 10 кун берилган. Сиз 3 кунни захирага олиб, етти кунда иш битиришга, шу билан бирга ўзингизга вақт ажратишга ҳаракат қилинг. Эрта уйқуга ётиб, тонгда барвақт туринг, тўйимли нонушта қилиб уч соат давомида ишингизни бажаринг, вақт ўтгач тоза ҳаво олгани ҳовли ёки кўчага чиқинг, қаҳва ичинг, 5 дақиқа ўзингизга келиб, тушликка қадар яна ишланг. Қарабсизки, ўзингизни қийнаб қўймаганингиз учун ҳам ишни тезроқ битиришга кучингиз ҳам, вақтингиз ҳам бемалол етади.

Овқатланишга эътибор беринг

Сиз истеъмол қилган таом ҳазм бўлиши учун ортиқча куч талаб қилиши эмас, сизга энергия бериши керак. Овқатланишда мавсумни, ҳароратни ҳам инобатга олинг. Витаминларга бой мева ва сабзавотларни канда қилманг. Шоколад, кофе билан ўзингизни рағбатлантириб туринг, фақат меъёрни унутманг.

Дам олинг, ўзингизга вақт ажратишни ҳам билинг

Иш ҳеч қачон тугамайди, лекин сиз тиниқиб дам олган бўлсангиз, ишингизда самара бўлади. Энергиянгиз тугагунича ўзингизни зўриқтириб ишласангиз, мия сизга қулоқ солмасдан ўзича ечимлар топади. Бунда на ишингизда унум бўлади, на соғлиғингизда. Тинимсиз ишлаган миянинг дам олишига ҳам шароит яратиб бериш керак. Бунинг учун йўқ деганда ҳафтанинг бир кунини ўзингиз учун ажратинг — севимли таомингизни ўз қўлингиз билан тайёрланг, мевалардан смузи тайёрлаб, севимли инсонингиз билан биргаликда фильм томоша қилинг, телефон ва интернетни унутиб, оилангиз ёки дўстларингиз билан табиат қўйнида пикник уюштиринг. Ишлаш, пул топиш керак деб ҳаётингизнинг, умрингизнинг энг гўзал чоғларини ўтказиб юборманг.