Ҳайдовчилик гувоҳномасини янги намунадагисига алмаштириш муддати бир йилга узайтирилди

Ўзбекистонда эски намунадаги ҳайдовчилик гувоҳномаларини янгисига мажбурий алмаштириш муддати бир йилга узайтирилди ва 2021 йил охиригача деб белгиланди. Бу ҳақда Адлия вазирлигининг Telegram’даги «Ҳуқуқий ахборот» канали хабар берди.

Ҳукуматнинг айрим қарорларига Вазирлар Маҳкамасининг 22 майдаги 319-сонли қарори билан ўзгартиришлар киритилган.

Уларга кўра, эски намунадаги миллий ҳайдовчилик гувоҳномаларини янги намунадаги гувоҳномага мажбурий алмаштириш муддати 2021 йил 31 декабргача узайтирилди. Бундан аввалги муддат 2020 йил 31 декабрь этиб белгиланган эди.

Эски намунадаги миллий ҳайдовчилик гувоҳномалари ҳамда автомототранспорт воситаси рўйхатдан ўтказилганлиги тўғрисидаги гувоҳномалар 2022 йил 1 январдан бошлаб ҳақиқий эмас деб ҳисобланади (илгариги муддат 2021 йил 1 январь эди).

Бундан ташқари, автомототранспорт воситасини 12 ой мобайнида бошқарганликни тасдиқловчи ҳужжатлар қаторига транспорт воситаси эгасининг яқин қариндошлари учун автомототранспорт воситаси рўйхатдан ўтгани тўғрисидаги гувоҳнома ва транспорт воситаси эгасининг фуқаролик жавобгарлигини мажбурий суғурта қилиш бўйича суғурта полиси ҳам қўшилди.

Ўзбекистонда янги намунадаги ҳайдовчилик гувоҳномаларини бериш 2017 йилда бошланган. Фуқаро ҳайдовчилик гувоҳномасини алмаштириши учун доимий яшаш жойидаги давлат хизматлари марказига, марказда бундай хизмат мавжуд бўлмаган ҳудудларда ЙҲХБнинг тегишли бўлинмаларига мурожаат қилади.

Бунда фуқаролик паспорти, эски ҳайдовчилик гувоҳномаси ва унинг талонини тақдим этиш лозим. Эски гувоҳномани янгисига алмаштириш учун базавий ҳисоблаш миқдорининг 70 фоизи миқдорида тўлов амалга оширилиши зарур.