Буюк Британия бош вазирини COVID-19 сабаб мамлакатда қаттиқ чекловларни жорий этишга кўндирган британиялик етакчи эпидемиолог Нил Фергюсон ҳукумат қошидаги илмий кенгашдан кетди, деб ёзади The Daily Telegraph газетаси.
Маълумотларга кўра, Фергюсон мамлакатда жорий этилган масофаланиш тўғрисидаги қоидани бузгани сабаб Британия ҳукуматига бошқа маслаҳат бермайди. Таъкидланишича, Лондондаги Империал коллежи профессори ўз уйида оилали аёл билан учрашган.
Нил Фергюсон — Империал коллежи математиги. У COVID-19 пандемияси ривожланишининг математик моделини яратган муаллифлардан бири ҳисобланади. Фергюсон гуруҳидаги олимлар чеклов чораларининг енгиллаштирилиши Буюк Британияда юз минглаб одамнинг ўлимига олиб келишини прогноз қилган. Фергюсон коронавирус тарқалишини камайтириш мақсадида одамлар ўрасидаги масофани қатъий сақлаш тарафдори бўлган.
Жонс Ҳопкинс университети маълумотларига кўра, Буюк Британияда коронавирус билан касалланганлар сони 196 минг кишидан ошган, 30 мингга яқин бемор вафот этган.
Апрель ойининг охирларида Британияда эпидемия чўққисидан ўтгани, ҳукумат карантин чораларини юмшатиш режасини тайёрлаётгани ҳақида хабар берилганди.
Изоҳ (0)