Тошкент вилояти, Ангрен шаҳрида яшовчи Ф. (аёл) вилоят юқумли касалликлар шифохонасига ўта оғир аҳволда 19 апрель куни ётқизилган ва сунъий нафас олдириш аппаратига олинган. Таҳлиллардан сўнг беморда COVID-19 инфекцияси аниқланган.
«Шундан сўнг унга ихтисослашган тиббий ёрдам кўрсатиш мақсадида бемор Тошкент тиббиёт академиясининг кўп тармоқли тиббиёт клиникасига ўтказилган. Беморда ўпканинг сурункали обструктив касаллиги, икки томонлама бронхопневмония, ўткир респиратор дистресс синдром, гипертония касаллиги иккинчи босқич, хавф 4, семизликнинг 3-даражаси бўлганлиги сабабли касаллик оғир кечиб, даволаниш давомида ҳамиша сунъий нафас олдириш аппаратида бўлган», – дейилади Соғлиқни сақлаш вазирлиги хабарида.
Беморнинг шу кунгача аҳволи соҳага ихтисослашган тиббиёт муассасаларининг нуфузли мутахассислари назоратида бўлган. Улар томонидан мунтазам консилиумлар ўтказиб келинган. Бироқ белгиланган стандартлар асосида ўтказган реанимацион муолажаларга қарамасдан, бемор ўткир респиратор дистресс синдроми, ўткир нафас, ўпка-юрак ва полиорган етишмовчилигидан вафот этган.
Бу Ўзбекистонда коронавирусга чалинган беморнинг вафот этиши билан боғлиқ саккизинчи ҳолатдир. Бунгача
- 27 март куни Наманган вилоятида Умрадан қайтган қизидан коронавирус юқтириб олган 72 ёшли онахон миокард инфарктидан (унинг жанозасида қариндошларидан ҳеч ким иштирок этмаган);
- 28 март куни Тошкент шаҳрида ўзини уйда даволашга уринган 39 ёшли (эркак) шифокор коронавирус инфекциясидан;
- 7 апрель куни коронавирусга чалинган 40 ёшли эркак юрак ва ўпка етишмовчилигидан;
- 11 апрель куни эса хориж сафаридан коронавирусга чалиниб қайтган фарғоналик 59 ёшли аёл ўткир респиратор дистресс синдром, ўткир нафас етишмовчилиги ҳамда ўпка-юрак етишмовчилиги оқибатида;
- 14 апрель куни Наманган шаҳрида яшовчи 73 ёшли Ш. юрак қон-томир етишмовчилигидан;
- 18 апрель куни Тошкент шаҳрида 77 ёшли аёл коронавирус инфекцияси асоратлари — икки томонлама бронхопневмониянинг оғир кечиши, ўткир нафас етишмовчилиги ва ўпка шишидан;
- 22 апрель куни Наманган шаҳрида яшовчи 54 ёшли бемор (аёл) ўткир нафас ва юрак қон-томир етишмовчилигидан
Ўзбекистонда 24 апрель соат 10:00 ҳолатига кўра, коронавирус инфекциясини юқтириб олганлар сони 1778 нафарни ташкил этмоқда. Мамлакатда 15 мартдан буён коронавирусга чалинган беморларнинг 598 нафари эса соғайган. Хорижда 73 ўзбекистонликда коронавирус аниқланган (энг кўпи — 42 нафари Россияда), уларнинг тўрт нафари вафот этган.
Изоҳ (0)