Хитойда 8 апрель куни коронавирусга чалиниш бўйича 63 та ҳолат аниқланди, 2 киши вафот этди, шунингдек, 91 киши тузалди, деб хабар бермоқда «РИА Новости» мамлакат Соғлиқни сақлаш миллий комиссияси маълумотларига таяниб. Қайд этилишича, янги аниқланган касалланганларнинг 61 нафари вирусни четдан, қолган 2 нафари эса мамлакатнинг ўзида юқтирган.
Бир кун аввал, 7 апрель куни, бу кўрсаткич 32 тани ташкил қилгани, мамкакатда январдан бери илк бор бир сутка давомида коронавирусдан ҳеч ким вафот этмагани хабар берилган эди. 6 апрель куни янги касалланганлар сони 39 та, 5 апрель куни 30 та, 4 апрель куни 19 тани ташкил этган.
Умумий ҳисобда, Хитойда коронавирусни четдан юқтириш билан боғлиқ 1 103 та ҳолат қайд этилган. Улардан 729 нафари касалланганлигича қолмоқда (шундан 31 нафарининг аҳволи оғир), 374 киши тузалган. Четдан вирус юқтириб келганларнинг бирортаси вафот этмаган.
Жонс Ҳопкинс маълумотларига кўра, Хитойда коронавирус аниқланганидан буён 82 867 киши касаллангани тасдиқланган, 77 639 нафар бермор тузалган, 3339 киши вафот этган.
Эслатиб ўтамиз, Хитой ҳукумати 1 апрелдан бошлаб коронавирус ҳеч қандай белгиларсиз тарқалаётгани ҳақида маълум қилганди. Сўнгги суткада 56 та шундай ҳолат аниқланган. Уларнинг 28 таси четдан юқтирилган.
Шунингдек, ўтган бир сутка ичида 32 кишига карантиндан жавоб берилган. Тест уларда вирус борлигини кўрсатган бўлса-да, бироқ касалликнинг ҳеч қандай аломатлари аниқланмаган. Айни пайтда касаллик аломатлари кузатилмаётган яна 1 104 киши шифокорлар назоратида бўлиб турибди.
Эпидемия ўчоғи бўлган Хубэй провинциясида сутка давомида касалланиш билан боғлиқ бирорта ҳолат қайд этилмаган. Беморларнинг 45 нафари тузалган, икки нафари вафот этган (ҳар икки ҳолат ҳам Уханда).
Айни пайтда дунё бўйича коронавирусга чалинганлар сони 1 484 811 нафарга, вафот этганлар эса 88 538 нафарга етди. АҚШ коронавирус қурбонлари сони бўйича дунёда иккинчига айланди. Мамлакатда бир суткада 1 965 бемор вафот этди.
Ўзбекистонда эса коронавирусга чалинганлар сони 555 нафарни ташкил қилмоқда.
Изоҳ (0)