АҚШнинг Касалликларни назорат қилиш ва олдини олиш маркази (CDC) коронавирусга чалинганлар сонини, шу жумладан, касаллик аломатларсиз ўтган шахсларни аниқлаш мақсадида антителаларга тест ўтказишни бошлади, деб хабар бермоқда Politico.
Қайд этилишича, ушбу тест вирус одамга юққан-юқмаганлигини, касалликдан тузалганини ва унга иммунитет ҳосил қилганини аниқлашга ёрдам беради.
Тест уч гуруҳдаги одамлардан: коронавирус эпидемияси ўчоғида яшаётган, лекин касалликка чалинмаган шахслардан, коранавирус унча кенг тарқалмаган ҳудудларда яшаётган шахслардан, шунингдек, муайян аҳоли гуруҳларидан, шу жумладан, тиббиёт ходимларидан олинади.
АҚШнинг Озиқ-овқат маҳсулотлари ва дори воситалари сифати бўйича санитария назорати бошқармаси (Food and Drug Administration — FDA) тестларни 1 апрелдан бошлаб ўтказишга рухсат берган.
Таъкидланишича, ушбу тадқиқот АҚШ ишчи кучларини тиклашга ёрдам беради ва вирус турли шароитларда ўзини қандай тутишини тушуниш имконини беради.
АҚШда касалликка чалинганлар сони бўйича дунёда биринчи ўринда кетмоқда. Мамлакатда айни пайтда 312 249 киши коронавирусга чалинган. Унинг ортидан Испания (130 759), Италия (124 632) ва Германия (97 052) давлатлари ўрин олган.
Изоҳ (0)