Наманганда ЙПХ ходимларидан қочишга уринган ҳайдовчи қўлга олинди (видео)

Наманган шаҳрида ЙПХ ходимларининг талабига бўйсунмай қочиб кетишга уринган ҳайдовчи қўлга олинди. Бу ҳақда ИИВ ЙҲХББ ахборот хизмати хабар берди.

«Наманган шаҳрида олиб борилган рейд тадбирлари давомида 50 L 436 GA давлат рақами белгили Nexia автомобиль ҳайдовчиси тегишли ҳужжатларни тақдим эта олмаган. Автомобиль ҳайдовчисида ўзига тегишли ҳайдовчилик гувоҳномаси бўлмаганлиги сабаб у ЙПХ инспекторига бўйсунмасдан, ҳаракатни номаълум томонга давом эттириб қочиб кетди», — дейди вилояти ИИБ ЙҲХБ инспектори.

Орадан кўп ўтмай, карантин талабларини бузган фуқаро «Сардоба» маҳалласидан биридаги кўчаларда қўлга тушган.

Аввалроқ Жиззахда ЙПХ инспекторини 600 метрга судраб кетган «стикер»сиз ҳайдовчи ушлангани ҳақида хабар берилганди.

Эслатиб ўтамиз, Ўзбекистонда 30 март куни соат 06:00 дан шахсий транспортдан фойдаланишга чеклов қўйилди. Фақат Давлат хизматлари марказлари томонидан бериладиган махсус рухсатнома (стикер)га эга автотранспорт воситалари ҳаракатланишига рухсат берилди.