Ўзбекистон ТИВ матбуот хизмати Туркияда бўлиб турган Ўзбекистон фуқароларига мурожаат билан чиқди.
Қайд этилишича, ҳозирда Туркияда, хусусан, Истанбулдаги вазият таранглигича қолмоқда. Бош консулхона Ўзбекистонга қайтмоқчи бўлган фуқаролар рўйхатини тузиб, уни ТИВга юборади.
Ушбу рўйхат ҳар куни мурожаатлар асосида янгиланиб, тўлдирилади ва ваколатли идораларга, хусусан, республика махсус комиссиясига, Транспорт, Соғлиқни сақлаш, Фавқуолдда вазиятлар вазирлигига ва миллий авиакомпанияга юборилади. Ушбу идоралар ҳамкорликда чартер рейсларни амалга ошириш ва ташкилий масалаларни ҳал қилади.
Истанбулдан 21 ва 24 март кунлари чартер рейслар ташкиллаштирилиши натижасида 500 га яқин ўзбекистонликлар ватанда қайтарилгани ва бу жараён давом эттирилиши таъкидланган.
«Бош консулхона олдида тўпланиб, дипломатларимиз ваколатига кирмайдиган турли талаблар қўйиш (зудлик билан чартер рейсни ташкиллаштириш) билан масалани ҳал қилиб бўлмайди, вазият таранглигича қолаверади», — дейилади вазирлик хабарида.
Шунингдек, хорижий мамлакатлар Тошкентдаги дипломатик ваколатхоналари билан яқин алоқада бўлиб, Ўзбекистондаги ўз юртига кета олмаган уч мингдан ортиқ чет эл фуқаролари ўз ватанларига қайтарилгани қайд этилган.
«Ҳурмали Туркиядаги фуқароларимиз, сизни бир оз сабрли ва матонатли бўлишга, тинчлик ва осойишталикни сақлашга чақириб қоламиз», — дейилади хабарда.
Изоҳ (0)