«Барселона» футбол клуби ёзги трансфер ойнасида жамоа таркибида катта ўзгаришларга қўл урмоқчи.
Испаниянинг Sport нашри хабарига кўра, «кўк-анорранглилар» бирданига саккиз нафар футболчиси билан хайрлашишга тайёр. Жамоани тарк этишга асосий номзодлар ярим ҳимоячилар Иван Ракитич ва Артуро Видаль бўлиб турибди. Ҳар икки футболчининг амалдаги шартномаси 2021 йилнинг ёзига қадар мўлжалланган. Шу билан бир қаторда «Барселона» чилилик футболчини «Интер» ҳужумчиси Лаутаро Мартинесга алмашмоқчи.
Шунингдек, каталон клуби дарвозабон Нето, ҳимоячилар Самюуэль Умтити ва Эктор Фирпо, ярим ҳимоячи Филиппе Коутиньо ва ҳужумчи Мартин Брэйтуэйтни сотиб юбормоқчи. Бироқ жамоа ҳозирча Коутиньога харидор топа олгани йўқ ва уни яна ижарага бериб юбориши мумкин.
«Барселона»нинг ёздаги энг даромадли трансфери Антуан Гризманн бўлиши мумкин. Франциялик футболчи 2019 йилнинг ёзида жамоа сафига келиб қўшилганди, бироқ «Барселона» раҳбарияти у билан хайрлашиш ниятида.
Аввалроқ «Барселона» ПСЖ ҳужумчиси Неймарни ортга қайтармоқчи экани ҳақида хабарлар янграганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)