Ўзбекистон ҳудудида 2020 йил 24 март соат 00:01 дан бошлаб коронавирус инфекцияси тарқалишига қарши кучайтирилган тартиб жорий этилиши ҳақида хабар берилган эди.
Мазкур тартибни жорий этишни кўзда тутувчи ҳукумат қарорига кўра, фуқаролар томонидан Интернет жаҳон ахборот тармоғи ва телефон алоқаси учун тўловлар ўз вақтида амалга оширилмаганлиги сабабли мазкур хизматларнинг икки ой давомида ўчирилишига йўл қўйилмайди.
Ucell компанияси томонидан маълум қилинишича, Вазирлар Маҳкамасининг мазкур қарори мобил алоқа тармоқлари, шу жумладан, Ucell томонидан тақдим этилаётган хизматлар доирасига кирмайди ҳамда компания томонидан тўловсиз хизматлар тақдим этилмайди.
«Ҳурматли абонентлар! Сизга шуни маълум қиламизки, Вазирлар Маҳкамасининг қарорига биноан, телефон алоқаси ва интернет тармоғига уланиш хизматларини (симли алоқа тармоқларида) ўчириб қўйиш тақиқланган.
Мобил радиотелефон (уяли) алоқа тармоқлари, шу жумладан, Ucell МЧЖ (Ucell савдо белгиси) томонидан тақдим этилаётган хизматлар ушбу қарор доирасига кирмайди ва тўловсиз хизматлар тақдим этилмайди», — дейилади компания хабарида.
Компания таълим ва тиббиёт соҳасида кўплаб сайтларнинг саҳифасига бепул кириш имкониятини очганлигини эслатиб ўтган. Хусусан, қисқа фавқулодда ёрдам хизматларига қўнғироқларни бепул амалга ошириш мумкин.
Эслатиб ўтамиз, Beeline, Mobiuz, Uzonline ва Uzmobile ўз абонентларига коронавируснинг тарқалиши ҳақида тезкор ва расмий маълумотларни олиши учун «Дарё» ва бошқа сайтларга бепул кириш имкониятини тақдим этган.
Эслатиб ўтамиз, 24 мартдан Ўзбекистонда коронавирус инфекцияси тарқалишига қарши кучайтирилган тартиб жорий этилди. Айни пайтда Ўзбекистонда коронавирусга чалинганлар сони 50 нафарни ташкил этмоқда.
Изоҳ (0)