Ўзбекистоннинг 253 нафар фуқароси чартер рейс орқали Новосибирскдан олиб келинди

22 март, якшанба куни, Uzbekistan Airways Толмачёво аэропортидан Новосибирск—Тошкент йўналиши бўйича чартер қатновини амалга оширди. Самолётда 253 нафар Ўзбекистон фуқароси бўлган.

Компания матбуот хизматининг хабар беришича, мазкур қатнов транспорт вазирининг биринчи ўринбосари  Илҳом Маҳкамов, бошқарув раисининг ўринбосари, тижорат ва туризм бўйича директори вазифасини бажарувчиси Шуҳрат Худойқулов ҳамда Ташқи ишлар вазирлиги комиссияси аъзолари кўмагида ва ёрдамида амалга оширилди.

Йўловчилар Президент Шавкат Мирзиёевга, бош вазир Абдулла Арипов ҳамда авиакомпаниянинг чартер қатновлари жадвалини ишлаб чиқарган Махсус республика комиссиясига миннатдорчилик билдирган.

Uzbekistan Airways’нинг кейинги чартер қатновлари ҳақидаги барча маълумотлар авиакомпания сайтида ва ижтимоий тармоқларда эълон қилиниши айтилган.

Аввалроқ Ўзбекистон Президенти Шавкат Мирзиёев хориждаги ватандошларни Ўзбекистонга қайтариш ҳақида кўрсатма берган эди.  Ташқи ишлар вазири маслаҳатчиси Жаҳонгир Хидайхўжаевнинг маълум қилишича, Россия, Туркия, Миср, Ҳиндистон, Малайзия, Жанубий Кореядан 7 та чартер рейс орқали жами 1750 дан ортиқ Ўзбекистон фуқароси ватанга қайтарилган бўлиб, улар 14 кунлик карантинга олинган.Эслатиб ўтамиз, 16 мартдан бошлаб хорижий давлатлар билан барча авиарейслар бекор қилиниб, автотранспорт воситасида Ўзбекистонга кириш-чиқиш тўхтатилди. Сўнгги маълумотларга кўра, Ўзбекистонда коронавирус билан касалланганлар 45 нафарни ташкил этмоқда.