АҚШ президенти Дональд Трамп мамлакатда COVID-19 коронавирус инфекцияси тарқалиши оқибатида фавқулодда ҳолат режими эълон қилинганини билдирди. Бу ҳақда CNN хабар берган.

Фото: CNN

Фавқулодда ҳолат режимида АҚШ давлат органларига коронавирусга қарши курашиш учун қўшимча маблағлар ажратади. CNN маълумотига кўра, гап ўнлаб миллиард долларлар ҳақида бормоқда.

Президент Дональд Трампнинг фавқулодда ҳолат режимини эълон қилган видеоси Оқ уй томонидан жамоатчилик эътиборига етказилган.

Аввал Оқ уйнинг Трампни коронавирус билан касалланган одамнинг ташрифидан кейин текширишдан бош тортгани, АҚШдаги биржа бозорларида 1987 йилдан буён энг катта пасайиш кузатилгани ҳақида хабарлар берилган. Шунингдек, америкалик машҳур актёр Том Хенкс ва унинг рафиқаси Ритада 12 март куни коронавирус касаллиги мавжуд экани аниқланган. Кейинчалик Хенкс Twitter’даги саҳифасида ғамхўрлик қилаётган барчага миннатдорчилик билдириб, COVID-19 касаллиги бошқаларга тарқамаслиги учун карантинда эканини маълум қилган.