АОКАда 6 март, жума куни, Монополияга қарши курашиш қўмитаси мутасаддилари иштирокида матбуот анжумани ташкил этилди. Унда қўмита раҳбарияти журналистлар томонидан берилган саволларга атрофлича жавоб қайтарди.
«Дарё» мухбири Миролим Исажоновнинг хабар беришича, қўмита раиси Нажмиддин Шарипов ижтимоий тармоқларда Humo картасига ўтишга мажбурланаётганини баён этаётган ходимлар эътирозига ўз муносабатини билдирди.
«Humo’нинг истеъмолчиси банк эмас, балки иш берувчи саналади. У ходимлари иш ҳақини қайси тизим орқали тушуришни ўзи ҳал қилади. Банк вакили тадбиркорга хизмат кўрсатади, холос. Қайси пластик карта тизимини танлаш ишбилармон ихтиёрида. Барча банкларда Humo ҳам, Uzcard ҳам ишлайди.
Ташкилот, корхоналарнинг оддий ходимлари раҳбарият томонидан қандай пластик карта берилса, ўшани ишлатишга мажбур. Бу масалани улар эмас, раҳбари ҳал этади. Humo тизимига ўтган ва эътироз билдираётган ишчилар норозиликлари орқали бирор нарсага эришолмайди. Барчаси уларнинг раҳбарига боғлиқ. Чунки иш берувчи банк билан шартнома тузаётганда, хизмат кўрсатиш турлари маъқул келган пластик картадан бирини ўз хоҳишига кўра танлайди.
Агар тадбиркор ёки иш берувчилар Humo’га ўтишга мажбурланаётган бўлса, бизга мурожаат қилишсин. Биз бундай ҳолатларни ўрганиб чиқиб, тегишли чораларни кўрамиз», — деди Шарипов.
Изоҳ (0)