Ўзбекистонда 2020 йилда ўқотар қуроллар учун янги турдаги патронлар ишлаб чиқариш бошланади
Ўзбекистондаги мудофаа аҳамиятига эга бўлган «Чирчиқ авиация таъмирлаш заводи» давлат корхонаси (ДК), «‘Восток’ Илмий ишлаб чиқариш бирлашмаси» давлат унитар корхонаси (ДУК) каби бир қатор корхоналар ўтган йиллар давомида оғир иқтисодий аҳволга келиб қолган эди. Бу ҳақда «Дарё»га Ўзбекистон Мудофаа саноати давлат қўмитаси хабар бермоқда.
Қайд этилишича, Ўзбекистон Президенти — Қуролли Кучлар Олий Бош Қўмондони Шавкат Мирзиёевнинг ташаббусига кўра, 2017 йил 20 ноябрда давлат мудофаа буюртмаларини шакллантириш ҳамда мудофаа аҳамиятига эга бўлган ишлаб чиқариш соҳасида ягона давлат сиёсатини олиб боришга масъул бўлган давлат органи — Ўзбекистон Мудофаа саноати давлат қўмитаси тузилган.
Қўмитанинг асосий вазифалари сифатида давлат мудофаа буюртмаларини шакллантириш ва бажаришни таъминлаш, давлат ва хўжалик бошқарув органлари, маҳаллий ижро этувчи ҳокимият органлари, ташкилотларнинг мудофаа саноати соҳасидаги фаолиятини мувофиқлаштириш, қурол-аслаҳа, ҳарбий ва махсус техникалар ҳамда бошқа мулкни ишлаб чиқариш, таъмирлаш, модернизация қилиш, халқаро ҳарбий ҳамкорликни йўлга қўйиш ва бошқа долзарб вазифалар белгиланди.
Ўтган икки йил мобайнида қўмита томонидан мамлакат саноатининг ҳарбий мақсадда фойдаланиладиган маҳсулотларни ишлаб чиқариш салоҳиятини ривожлантиришни таъминлаш ва миллий армияни замонавий қурол-яроғ, жанговар техника, махсус воситалар ва айрим турдаги озиқ-овқат маҳсулотлари билан таъминлаш бўйича мақсадли ишлар бажариб келинмоқда.
Жумладан, дунёнинг 20 дан ортиқ ривожланган давлатлари билан ҳарбий-техник ҳамкорлик ўрнатилди, олти давлат билан ҳукуматлараро комиссия фаолияти йўлга қўйилди, 10 дан ортиқ давлат билан ҳарбий-техник ҳамкорлик йўналишида халқаро битим ва келишувлар имзоланди. Тизимли равишда замонавий қурол-аслаҳа ва жанговар техникаларни харид қилиш ишлари амалга оширилмоқда.
Қуролли Кучларнинг ҳарбий мақсадда фойдаланиладиган маҳсулотларга бўлган талабларини ўз вақтида ва сифатли қондириш мақсадида 2018—2019 йилларда «КамАЗ» автомобили шассисида юк ва махсус автомобиль техникаларини, ҳарбий мақсадда фойдаланиладиган радиоалоқа воситалари, нафас олиш органлари ҳимоя воситалари, озиқ-овқат паёклари ва бошқа турдаги ҳарбий мақсадда фойдаланадиган маҳсулотларни ишлаб чиқариш бўйича бир қанча тармоқлараро лойиҳалар амалга оширилди.
Мудофаа вазирлиги куч ва воситаларини жалб қилган ҳолда мавжуд моддий ва маънавий жиҳатдан эскирган қурол-аслаҳаларни модернизация қилиш бўйича ишлар амалга оширилмоқда.
Жумладан «БМ-21 Град» русумли ялпи ўт очиш реактив тизими янги замонавий шассига ўрнатилди ва бу тизим амалий синовлардан муваффақиятли ўтди.
«БТР-70» русумли транспортерга янги замонавий дизель двигатели, узатиш қутиси ўрнатилиб мобил имкониятлари оширилди. Шунингдек, шахсий таркиб ҳимоясини ошириш мақсадида қўшимча зирҳ ва кумулятив панжара билан жиҳозланди.
«Т-64» русумли танкнинг куч бўлими тўлиқ реконструкция қилиниб, замонавий, катта қувватга эга двигатель ва трансмиссия агрегатлари қўйилди, рақамли алоқа воситалари билан жиҳозланди.
«Газ-66» русумли автомобилларга Isuzu двигателлари ва узатиш қутиларини ўрнатган ҳолда модернизация қилиш йўлга қўйилди. Бу, ўз навбатида, уларнинг ҳаракатчанлик ва мобил имкониятларини оширди.
Шунингдек, «КамАЗ» автомобиллари шассида барча шароит ва ҳудудларда қўшинлар бошқарувини таъминлай оладиган мобил қўмондонлик бошқарув пункти, шунингдек, замонавий асбоб ва ускуналар билан жиҳозланган, ҳар қандай мураккаб тиббий амалиётларни амалга оширишга қодир тиббиёт пункти яратилди.
Бундан ташқари, «Чирчиқ авиация таъмирлаш заводи» ДК реконструкция қилиниб, тўлиқ капитал таъмирдан чиқарилди ва технологик жиҳатдан қайта жиҳозланди. Бунинг натижасида корхона томонидан кўрсатилаётган хизмат турларини кенгайтириш имкони яратилди. Жумладан, «Ми» русумидаги вертолётларнинг таъмирланаётган жиҳозлари номенклатураси ортди, «Су-25» русумли самолётларни таъмирлаш ўзлаштирилмоқда.
«Восток» ДУКда бугунги кунда ўқотар қуроллар учун ўқ-дорилар ишлаб чиқарилмоқда. Амалга оширилган тадбирлар натижасида 2020 йилнинг биринчи ярмида янги турдаги патронлар ишлаб чиқарувчи линиянинг ишга туширилиши режалаштирилмоқда.
Ҳарбий кийим-анжомларни ишлаб чиқариш бўйича ўзбек-турк қўшма корхонаси тузилиб, 2019 йилда дастлабки цех фаолияти йўлга қўйилди, 2020 йил иккинчи чоракда корхона тўлиқ қувватда ишга туширилиши режалаштирилган.
2020 йилда Ўзбекистон Мудофаа саноати давлат қўмитаси томонидан қўмита тасарруфидаги ва маҳаллий корхоналарда ишлаб чиқарилаётган ҳарбий мақсадда қўлланадиган маҳсулотлар ва хизматлар кўрсатиш кўрсаткичларини икки баробарга ошириш режалаштирилган.
Белгиланган пировард натижаларга эришиш ҳамда мамлакат мудофаа салоҳиятини мустаҳкамлаш мақсадида 2020—2025 йилларда Ўзбекистон Республикаси мудофаа саноатини янада ривожлантиришга қаратилган амалий ҳаракатлар режаси («Йўл харитаси») ишлаб чиқилмоқда.
