Бухоро вилояти Шофиркон тумани ҳокимлигида Халқ депутатлари туман кенгашининг навбатдан ташқари сессияси бўлиб ўтиб, унда туман ҳокими ўзгаргани маълум қилинди, деб хабар бермоқда «Дарё» мухбири.
Сессияда Бухоро вилояти ҳокими Ўктам Барноев кейинги йилларда туман ижтимоий-иқтисодий ривожлантириш, ижтимоий, қурилиш, коммунал соҳада муаммолар ошиб кетгани, уларни ҳал қилиш масалаларига жиддий эътибор қаратиш зарурлигини таъкидлади.
Шунингдек, вилоят раҳбари Ўзбекистон Президенти Администрациясининг розилиги билан Бухоро вилоят Марказий банк бошлиғи Шукрулло Ҳакимов номзодини Шофиркон тумани ҳокими вазифасини бажарувчиси этиб тайинлаш тўғрисида вилоят ҳокими қарори қабул қилинганлигини маълум қилди.
Ўтган йилнинг 11 июнидан жорий йилнинг 8 февралига қадар Шофиркон тумани ҳокими вазифасини Уйғун Ғаффоров бажариб келган. Айни пайтда у яна қишлоқ хўжалиги масалалари бўйича туман ҳокими ўринбосари лавозимида ўз фаолиятини давом эттирмоқда.
Маълумот учун, Шукрулло Ҳакимов 1984 йилда Шофиркон туманида туғилган. 2008 йилда Тошкент Молия инситути магистратурасини тамомлаган.Лавозимга тайинлангунга қадар, 2019 йилдан буён Бухоро вилоят Марказий банк бошлиғи лавозимида ишлаб келаётган эди. Аввалроқ «Микрокредитбанк» Бухоро вилояти филиали бошлиғи, ундан аввалроқ эса «Бухоропахтасаноат» ҳудудий филиали МЧЖ директори лавозимларида фаолият юритган.
Изоҳ (0)