Хитойда посилкаларни олишда коронавирусни юқтириб олмаслик учун нималарга эътибор қаратиш лозимлиги айтилди
Хитой касалликлар профилактикаси ва уларни назорат қилиш маркази эксперти Чжан Любо озиқ-овқат маҳсулотлари ва жўнатмаларнинг зарарини баҳолади. У овқат етказиб бериш ёки жўнатмалардан коронавирус юқаётгани асоссиз эканлигини маълум қилди, деб хабар беради «РИА Новости».
Чжан Любонинг таъкидлашича, вирус ҳаво-томчи йўли орқали юқади.
Экспертнинг сўзларига кўра, профилактика учун шунчаки гигиенага риоя қилинса бўлди. Шунингдек, бу вирус етказиб бериш хизматлари орқали юқаётгани исботланмаган. Товарлар қабул қилиб олингач, қўлни ювиш ва қутини ташлаб юбориш керак.
«Тайёр овқат солинган контейнерларни салфеткалар билан артиш керак», — дейди Любо.
1 февраль ҳолатига кўра, 2019-nCoV коронавируси оқибатида 259 киши вафот этди. Уни юқтириб олганлар сони эса 11,7 мингдан ошиб кетган.
Эслатиб ўтамиз, бош вазир Абдулла Арипов 28 январь, сешанба куни, коронавирус бўйича йиғилиш ўтказган эди. Жиззахда ҳам коронавирус тарқалгани ҳақида гап-сўзлар тарқалган, кейинроқ эса бу шунчаки миш-миш эканлиги маълум қилинганди. Ўзбекистон Ташқи ишлар вазирлиги ўзбекистонликлардан миш-миш тарқатмасликни сўраб, коронавирусдан ҳимояланиш бўйича тавсиялар бериб, Ухандан Ўзбекистонга қайтган талабаларга зудликда ССВ билан боғланишни сўради. Хитойдан қайтиб келган бир гуруҳ ўзбекистонлик талабалар аэропортнинг ўзида ҳар томонлама такомиллаштирилган тиббий текширувдан ўтказилди. Шунингдек, Соғлиқни сақлаш вазирлиги коронавируснинг Ўзбекистонга кириб келгани ҳақидаги гап-сўзларни инкор этган.
