Ўзбекистон Президенти Шавкат Мирзиёев Олий Мажлисга Мурожаатномаси вақтида Евросиё иқтисодий иттифоқи (ЕОИИ) билан ҳамкорлик муносабатлари ҳақида тўхталиб ўтди.
Президентнинг таъкидлашича, аҳоли даромадларини ошириш, қўшимча иш ўринлари яратиш, маҳсулот ишлаб чиқаришни кўпайтириш учун Ўзбекистонга янги-янги бозорлар керак, бунинг учун бозор иқтисодиёти ва давр талабларига мос кўплаб қонун ва қарорлар қабул қилиняпти ҳам. «Лекин, афсуски, уларни ижро қиладиган кўпгина амалдорлар ҳали ҳам эскича иш услуби, расмиятчилик ва бефарқликдан қутулгани йўқ», — деди давлат раҳбари.
Шавкат Мирзиёевнинг сўзларига кўра, жаҳон ишлаб чиқариш занжирларига, дунё бозори талабларига ва иқтисодий интеграция жараёнларига «ҳамоҳанг бўлишимиз лозим». «Мулоқот ва рақобатга тайёр бўлиш учун тармоқ раҳбарлари ўз устида тинимсиз ишлаши шарт. Мана, нима учун бизга иқтисодий интеграция керак!», — дея таъкидлади Президент ва, шу ўринда, Евросиё иқтисодий иттифоқи билан ҳамкорлик масалаларига тўхталиб ўтди.
Таъкидланишича, Ўзбекистондан ташқи савдога чиқадиган юкларнинг 80 фоизи Қозоғистон, Қирғизистон ва Россиянинг транзит йўлаклари орқали ўтади. Шунингдек, Ўзбекистон тайёр маҳсулотлари экспорти 50 фоизи, айрим товарлар бўйича эса 80 фоизи Россия, Қозоғистон, Қирғизистон ҳиссасига тўғри келади.
«Ана шу омилларни инобатга олиб ҳамда Россия ва Қозоғистонга ишлаш учун борган фуқароларимизга қулай шарт-шароит яратиш мақсадида, бугунги кунда Ўзбекистоннинг Евроосиё иқтисодий иттифоқи билан ҳамкорлик қилиш билан боғлиқ масалалар ўрганилмоқда», — дея маълум қилди Шавкат Мирзиёев.
«Биз, албатта, ушбу жиддий масалада, энг аввало, халқимизнинг манфаатларидан келиб чиқиб, уларнинг хоҳиш-иродасига таянамиз. Шунинг учун халқ вакиллари бўлган депутат ва сенаторларимиз парламент палаталарида мазкур масалани атрофлича муҳокама қилиб, ўз зиммаларига масъулиятни олган ҳолда, асосланган хулосаларини айтишлари керак», — дея қўшимча қилди давлат раҳбари.
Ўз навбатида, Шавкат Мирзиёев Вазирлар Маҳкамасига ушбу йўналишдаги таҳлилий ва комплекс баҳолаш ишларини якунлаб, тегишли хулоса ва таклифларни Олий Мажлис палаталарига тақдим этиш ҳақида кўрсатма берди.
«Шу билан бирга, биз Жаҳон савдо ташкилоти билан бошланган мулоқотимизни, ҳамда Европа Иттифоқи билан Ҳамкорлик ва шериклик тўғрисидаги янги битимни тузиш бўйича ишларни изчил давом эттирамиз. Шунингдек, биз бошқа халқаро ва минтақавий иқтисодий ташкилотлардаги иштирокимизни, янада кучайтирамиз», — деб қайд этиб ўтди Президент Шавкат Мирзиёев.
Изоҳ (0)