2019 йил 16 октябрь, чоршанба куни Тошкент шаҳридаги «Универсал» спорт саройида бўлиб ўтган каратэ бўйича ўсмирлар, ёшлар ва катталар ўртасидаги Ўзбекистон кубоги мусобақасида юз берган низоли ҳолат юзасидан Жисмоний тарбия ва спорт вазирлиги баёнот берди.
Таъкидланишича, мусобақа ҳаками Азизбек Бўриев Тошкент вилояти «Чемпион» каратэ спорт клуби мураббийи Дилшод Юсупов ҳамда Сурхондарё вилояти каратэ миллий федерацияси мурабиййи Абдулазиз Исматуллаевлар ўртасида мусобақа якуний натижаси юзасидан ўзаро тортишув келиб чиққан.
Қайд этилишича, мазкур келишмовчилик оқибатида ҳеч ким тан жароҳати олмаган. Ушбу ҳолат юзасидан Ўзбекистон каратэ миллий федерацияси юқоридаги спорт мутахассисларига нисбатан хизмат текшируви тайинлаган.
Текширув якуни юзасидан Ўзбекистон каратэ миллий федерацияси ҳаками Азизбек Бўриевни икки йилга ҳакамлик иш фаолиятидан четлатиш, Абдулазиз Исматуллаевни уч йилга ва Дилшод Юсуповни икки йилга мураббийлик фаолиятидан четлатиш ҳақида қарор қабул қилиган. Мусобақа бош ҳаками Қосимжон Қорабоевга эса ҳайфсан эълон қилинган.Ўз навбатида Ўзбекистон Республикаси Жисмоний тарбия ва спорт вазирлиги мазкур ҳолат иштирокчиси, каратэ бўйича Ўзбекистон ўсмирлар миллий терма жамоаси катта мураббийи ҳамда олий тоифали мураббий Азизбек Бўриевни Вазирлар Маҳкамасининг 2012 йил 14 июндаги 173-сон қарори билан тасдиқланган Спорт терма жамоалари тўғрисидаги низомга кўра маънавий-ахлоқий ва бошқа нормаларни бузилганлиги сабабли миллий терма жамоа таркибидан чиқарган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)