Tashkent City халқаро бизнес марказининг илк объектлари — Конгресс-холл ва Hilton меҳмонхонаси қуриб битказилди. Президент матбуот хизматининг хабар беришича, Шавкат Мирзиёев 9 октябрь куни ушбу объектларни бориб кўрган.
Конгресс-холлнинг умумий майдони 43 минг квадрат метр бўлиб, унда йирик халқаро анжуманлар, олий даражадаги музокаралар ўтказиш учун барча шароит яратилган.
Биринчи қават марказида 3,5 минг иштирокчига мўлжалланган конференциялар зали бор. Заруратга қараб, у икки ёки тўртга бўлиниши ҳам мумкин.
Халқаро саммитлар вақтида икки томонлама учрашувлар ўтказиш учун хоналар, ресторан, кичик концерт зали, дам олиш жойлари ташкил этилган. Иккинчи қаватда қўшимча заллар бор.
«Беш юлдузли Hilton меҳмонхонаси нафақат ушбу марказ, балки бутун пойтахтимизга кўрк бўлди», — дейилади Президент матбуот хизмати ахборотида.
21 қаватли бинода 258 та номер мавжуд — 8 таси давлат раҳбарлари учун мўлжалланган. Пардозлаш ва жиҳозлашда иссиқ ранглар кўп қўлланилган. Отелда бир нечта ресторан, бассейн, спорт зал, спа ва бошқа салонлар бор.
Изоҳ (0)