Кредитнинг тўлангани ҳақидаги ҳужжатни сохталаштирган фуқарога нисбатан жиноят иши қўзғатилди. Бу ҳақда «Дарё»га Мажбурий ижро бюроси матбуот хизмати хабар берди.
«Ўзсаноатқурилишбанк» Наманган филиали томонидан «Ахсин тех сервис» МЧЖга 12 ой муддатга 1 миллиард сўм кредит ажратилган. Кредит эвазига А.И.га тегишли «Бобур автонақлсервис» жамиятига қарашли 4 дона Howo, Shaanxi русумли юк машиналари банк томонидан гаровга қўйилиб, тақиқ қилинган.
Наманган шаҳар иқтисодий судига олинган кредитни ўз вақтида қайтарилмагани ҳақида мурожаат келиб тушган ва суд томонидан кредит маблағини мажбурий ундириш бўйича ҳал қилув қарори қабул қилинган. Фуқаро А.И. эса филиал штамп ва муҳрини қалбакилаштириб, сохта ёзувлар киритиб, кредит маблағлари тўлангани ҳақдаги ҳужжат тайёрлагани аниқланган.
Шунингдек, А.И. тақиққа олинган автомашиналарни тақиқдан чиқариб, юк машиналарини сотиб юборгани аниқланган. Оқибатда давлат манфаатига 771 191 371 сўм зарар етказган.
Мазкур ҳолат юзасидан А.И.га нисбатан Жиноят кодексининг 228-моддаси 1 ва 3-қисми ҳамда 233-моддалар билан жиноят иши қўзғатилган.
Изоҳ (0)