Миллионлаб мухлислар интиқиб кутган футбол бўйича Европа Чемпионлар Лигасининг 2019/20 йилги мавсумига ҳам старт берилди.
18 сентябрь, чоршанба куни 1-тур ўйинларига якун ясалди. «Дарё» эса одатдагидек тур тафсилотларини бир саҳифага жойлади.
«А» гуруҳи«Брюгге»—«Галатасарой»
ПСЖ — «Реал Мадрид» 3:0
1-турнинг сўзсиз марказий учрашувларидан бири Парижда бўлиб ўтди. Унда мезбон ПСЖ мусобақа рекордчиси Зинедин Зидан бошлиқ «Реал»ни қабул қилди. Ўйиндан олдин Неймар, Кавани, Мбаппесиз қолган ПСЖнинг «Қироллик клуби»га қарши баҳсда анча қийналиши тахмин қилинганди. Бироқ тахминлар ўзини умуман оқламади. Учрашувнинг 14 ҳамда 33-дақиқаларида Анхел Ди Мария собиқ жамоаси дарвозасига бир-биридан чиройли иккита гол уришга эришган бўлса, ўйинга якуний нуқтани сўнгги дақиқаларда Тома Менье қўйди. Қайд этиш жоиз, Зидан шогирдлари ПСЖга қарши ўйинда дарвоза томон 1 та ҳам аниқ зарба бера олмади. Бундай ҳолат «Реал» билан Чемпионлар Лигасида 167 та ўйиндан бери содир бўлмаганди. Аммо таъкидлаш керак, Мадрид футболчилари баҳсда иккита гол урди. Аввалига Бэйлнинг голи тўп қўл билан ўйналди деб топилиб VAR ёрдамида бекор қилинган бўлса, сўнгра Бенземанинг голи Лукас Васкеснинг ҳаракати сабаб ҳисобга олинмади. Аммо ПСЖ шу куни Неймар, Кавани ва Мбаппесиз ҳам яхши ўйнай олиши, энг асосийси ғалаба қозониши мумкинлигини футбол жамоатчилигига кўрсата олди. «Реал»нинг нурсиз ўйини эса ҳали Зинедин Зидан олдида кўплаб ишлар кутиб турганини кўрсатди.
«Б» гуруҳи«Олимпиакос»—«Тоттенҳэм» 2:2
Турнинг энг қизиқарли учрашувларидан бири Грецияда бўлиб ўтди. Мусобақанинг амалдаги вице-чемпиони «Тоттенҳэм» «Олимпиакос» майдонига сафар қилиб, ғалабани қўлдан чиқарди. Почеттино шогирдлари биринчи бўлимнинг 4 дақиқаси ичида Ҳарри Кейн ҳамда Лукас Моуранинг голлари эвазига 2 та тўп фарқи билан олдинга чиқиб олди. Аммо мезбонлар 44-дақиқада Даниэль Поденсе ҳамда 54-дақиқада Матье Вальбуэналарнинг голлари эвазига мувозанатни тиклади. Шу ҳисоб ўйин сўнгига қадар ўзгармай қолди. «Шпорлар» эса мавсумда учинчи бор ҳисобда олдинда бориб, ғалабани бой берди.
«Бавария»—«Црвена Звезда»
Нико Ковач бошчилигидаги «Бавария» 1-турни Сербиянинг «Црвена Звезда» жамоасига қарши ўтказди. Мюнхенда бўлиб ўтган баҳс мезбонларнинг 3:0 ҳисобидаги ғалабаси билан якунлади. Биринчи бўлимда Кингсли Коман Борян қўриқлаётган дарвозани ишғол қилган бўлса, Роберт Левандовски ҳамда Томас Мюллер иккинчи бўлимнинг сўнгги 10 дақиқасида биттадан гол уришга эришди. Шу куни мюнхенликлар сафида ёзги трансферлар вақтида ижарага олинган Иван Перишич ҳамда Филиппе Коутиньолар клуб билан Чемпионлар Лигасидаги дебютини ўтказди.
«C» гуруҳи«Шахтёр»—«Манчестер Сити»
Премьер Лиганинг 5-турида «Норвич»дан тарсаки қабул қилиб олган «Манчестер Сити» евромавсумни эски таниши «Шахтёр»га қарши ўйин билан бошлади. Учрашувда ҳисоб 24-дақиқада Рияд Маҳрез томонидан очилди. Иккинчи гол эса Илкай Гундўғон томонидан 38-дақиқада киритилди. Ўйинга якуний нуқтани қўйиш эса 76-дақиқада бразилиялик ҳужумчи Габи Жезусга насиб этди. Қайд этиш жоиз, ушбу жамоалар мазкур мусобақа доирасида бешинчи бор тўқнаш келди. Бу ўйинларда «Сити» украинлар дарвозасини жами 15 марта ишғол қилишга эришди.
«Динамо Загреб»—«Аталанта»
Гуруҳдаги иккинчи йўлланма учун курашиши тахмин қилинган «Аталанта» клуби Загребга сафар қилиб, кутилмаган натижа билан ортга қайтишга мажбур бўлди. Шу куни мезбонлар «Динамо» жамоаси «Аталанта»дан ҳар жабҳада устулик қилди. Ва буни улар ҳисобда ҳам акс эттиришга эришди. Аввалига Марин Леовац 10-дақиқада «Динамо»нинг ўйиндаги илк голини урди. Беллашувнинг 31, 42 ҳамда 68-дақиқаларида мусобақадаги дебютини ўтказаётган Мислав Оршич учта гол уриб, ҳет-трикка эришди. Шу тариқа Загреб клуби мусобақани йирик ҳисобдаги ғалаба билан бошлади.
«Д» гуруҳи«Байер»—«Локомотив»
Қуръадан сўнг мазкур гуруҳ аутсайдерлари сифатида эътироф этилган Леверкузеннинг «Байер» ҳамда Москванинг «Локомотив» клублари 1-турда ўзара тўқнашди. Ўйиндан олдин немислар фаворит сифатида эътироф этилганди. Бироқ ўйин бунинг тамоман аксини тақдим этди. Москваликлар биринчи бўлимдаёқ ўйин тақдирини ҳал этди. Аввалига 16-дақиқада Гжегож Криховяк ўз номини таблога ёздириб қўйган ҳолда «Локо»ни олға бошлади. Орадан 9 дақиқа ўтиб, москваликларнинг германиялик футболчиси Бенедикт Ҳеведес автогол соҳибига айланди. «Темирйўлчилар»га ғалаба келтирган голга эса 37-дақиқада Димитрий Баринов муаллифлик қилди. Шу тариқа Юрий Сёмин жамоаси илк турни сенсацион ғалаба билан бошлади.
«Атлетико»—«Ювентус»
Турнинг яна бир марказий беллашуви Мадриддаги «Ванда Metropolitanо» стадионида кечди. Унда мусобақанинг ўтган мавсумида нимчорак финалда тўқнаш келган эски танишлар: «Атлетико» ҳамда «Ювентус» ўзаро тўқнашди. Биринчи бўлимда мухлислар гол кўрмади. Иккинчи бўлим аввалида Хуан Куадрадо ўзининг аниқ ва чиройли зарбаси билан Турин клубини ҳисобда олдинга олиб чиқди. 65-дақиқада эса Роналду—Сандро комбинациясини Блез Матюиди гол билан якунлашга эришди. Шундан сўнг гол уриш навбати мадридликларга келди. Аввалига 70-дақиқада Стефан Савич боши билан Шесни дарвозасини ишғол қилган бўлса, ўйиннинг сўнгги дақиқалари худди шундай ишни захирадан баҳсга қўшилган Эктор Эррера ҳам уддалади. Натижада томонлар 2:2 ҳисобидаги жанговар дурангга имзо чекди.
ЙЧЛ
1-тур баҳслари
18 сентябрь, чоршанба
«А» гуруҳи
«Брюгге»—«Галатасарой» 0:0
ПСЖ—«Реал Мадрид» 3:0
Голлар: 1:0 — 14 Ди Мария, 2:0 — 33 Ди Мария, 3:0 — 90 Менье«Б» гуруҳи
«Олимпиакос»—«Тоттенҳэм» 2:2
Голлар: 0:1 — 26, пенальти Кейн, 0:2 — 30 Лукас Моура, 1:2 — 44 Поденсе, 2:2 — 54, пенальти Вальбуэна«Бавария»—«Црвена Звезда» 3:0
Голлар: 1:0 — 34 Коман, 2:0 — 80 Левандовски, 3:0 — 90 Мюллер«C» гуруҳи
«Шахтёр»—«Манчестер Сити» 0:3
Голлар: 0:1 — 24 Маҳрез, 0:2 — 38 Гундўғон, 0:3 — 76 Габриэль Жезус«Динамо Загреб»—«Аталанта» 4:0
Голлар: 1:0 — 10 Леовац, 2:0 — 31 Оршич, 3:0 — 42 Оршич, 4:0 — 68 Оршич«Д» гуруҳи
«Атлетико Мадрид»—«Ювентус» 2:2
Голлар: 0:1 — 48 Куадрадо, 0:2 — 65 Матюиди, 1:2 — 70 Савич, 2:2 — 90 Эррера«Байер»—«Локомотив М» 1:2
Голлар: 0:1 — 16 Криховяк, 1:1 — 25, автогол Ҳеведес, 1:2 — 37 БариновЯнада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)