Россиянинг Екатеринбург шаҳри мезбонлик қилаётган бокс бўйича Жаҳон чемпионатининг навбатдаги кунида 3 нафар ўзбекистонлик боксчи рингга кўтарилди.
Дастлаб -52 кг вазн тоифаси вакили Шаҳобиддин Зоиров мусобақадаги иккинчини жангини ўтказди. Унга бу жангда Доминикан республикаси вакили Родриго Мартега рақиблик қилди. Зоиров ушбу жангда катта устунлик билан ғалаба қозонди — 5:0.
Сўнгра рингга -75 кг вазнда Ўзбекистон шарафини ҳимоя қилаётган Фанат Қаҳрамонов рингга кўтарилди. 1/16 финал баҳсида Фанатга австралиялик Адриан Каммарано рақиблик қилди. Қаҳрамонов ҳам худди Зоиров каби рақибини 5:0 ҳисобида мағлуб этиб, кейинги босқичга чиқди.
Куннинг сўнгги жангида эса -63 кг вазнда рингга чиқаётган Элнур Абдураимов иштирок этди. Элнур америкалик Кейшовн Дэвисга 0:5 ҳисобида ютқазиб, мусобақа билан хайрлашди. Қайд этиш жоиз, Элнур жанг давомида нокдаун ҳолатини ҳам бошдан ўтказди.
Шу тариқа 14 сентябрь кунги жангларда икки нафар ўзбекистонлик боксчи кейинги босқичга чиққан бўлса, бир нафари мусобақа билан эрта хайрлашишга мажбур бўлди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)