Хитой ҳукумати G7 етакчиларининг Гонконгдаги оммавий норозиликлар ҳақидаги баёнотига эътироз билдирмоқда. «ТАСС»нинг хабар беришича, бу ҳақда 27 август куни ўтказилган брифингда Хитой ТИВнинг расмий вакили Ген Шуан маълум қилган.
«Биз буни қоралаймиз ва G7 га аъзо давлатлар раҳбарларининг Гонконгдаги вазият билан боғлиқ асоссиз айбловлар айтилган баёноти муносабати билан ўз норозилигимизни билдирамиз», — деган у.
«Гонконгдаги вазият Хитойнинг ички иши эканлигини ва унга бирон бир хорижий ташкилот ёки ҳукумат аралашишга ҳақли эмаслигини бир неча бор билдирдик», — деб қўшимча қилган ТИВ вакили.
Катта еттилик раҳбарлари Гонконгдан ташвишланиб, «Бир мамлакат — икки тизим» тамойилини қўллаб-қувватлаган ҳолда чиққан эди.
Буюк Британия бош вазири Борис Жонсоннинг таъкидлашича, Франциянинг Биарриц шаҳрида бўлиб ўтган катта еттилик саммити якунига кўра, «G7 Гонконг бўйича 1984 йилги Хитой—Британия декларациясининг мавжудлигини ва аҳамиятини яна тасдиқлаган ва зўравонликдан қочишга чақирган».