Тошкентда эндиликда автобуслар бир кунда икки марта ювилади
«Тошшаҳартрансхизмат» АЖ ўз тасарруфидаги йўналишларда қатнаётган автобусларнинг санитария ҳолатларини янада яхшилаш мақсадида жамоат транспорти воситаларини бир кунда 2 марта ювиш ва тозалаш ишлари йўлга қўйилди. Бу ҳақда «Тошшаҳартрансхизмат» матбуот хизмати хабар берди.
Бунинг учун автобус саройлари томонидан гуруҳлар ташкил этилди. Тушлик вақтида шоҳбекатларда тўхтаган автобуслар 5—10 дақиқа давомида енгил тозалаб берилади. Асосий ювиш ишлари эса кечқурун автобус йўналишдан қайтгач автосаройда амалга оширилади.
Шу ўринда «Тошшаҳартрансхизмат» АЖ мутасаддилари йўловчилардан автобусларда юрганда тозаликка риоя этишини, транспорт воситаларини асраб-авайлашини сўраб қолади. Бу орқали улар жамоат транспорти кўп йиллар давомида бенуқсон хизмат қилишига ҳисса қўшган бўлишини таъкидлади.
