Голливуднинг таниқли актёри Рутгер Хауэр вафот этди

Асли нидерландиялик бўлган Голливуднинг таниқли актёри Рутгер Хауэр вафот этди. Бу ҳақда унинг агентига таяниб, Tengrinews хабар берди.

Таъкидланишича, 75 ёшли актёр узоқ давом этмаган касалликдан кейин Нидерландиядаги уйида 19 июлда вафот этган. Унинг дафн маросими 24 июль куни бўлиб ўтган.

Хауэр 1944 йил Амстердам яқинидаги Брекелен шаҳарчасида дунёга келган. Актёрлик фаолиятини 1960 йиллар охирида бошлаган ва «Флорис» телесериалидан кейин машҳурликка эришган.

Актёр «Тиғ устида югурувчи», «Ҳамроҳ», «Аждодлар чорлови», «Сўқир ғазаб», «Бетмен: Ибтидо», «Гуноҳлар шаҳри» каби фильмларда роллар ижро этган. 1988 йилда «Собибордан қочиш» мини-сериалидаги иккинчи пландаги роли учун «Олтин глобус» мукофот билан тақдирланган, 1999 йилда ватанида «Юз йилликнинг энг яхши актёри» номига сазовор бўлган.

Хауэр 150 дан кўпроқ фильмда суратга тушган. Бундан ташқари, у ўзини сценарийчи, продюсер ва режиссёр сифатида ҳам синаб кўрган.