«Вақф» фонди Рамазон ойида 2 миллиард сўмга яқин закот ва хайрия маблағларини тарқатди (фото)

«Вақф» фонди Рамазон ойида 1,8 миллиард сўмлик закот ва хайрия маблағларини ҳақдорларга етказди. Рамазон ойида Ўзбекистон мўмин-мусулмонларининг хайр-у эҳсонларини муҳтожларга етказиш мақсадида, «Вақф» хайрия жамоат фонди бир қанча хайрия тадбирларини ташкил этди. Рамазон ойида ташкил этилган юзлаб саховат тадбирларида қарийб 1,8 миллиард сўмлик закот ва эҳсонлар улашилди. Бу ҳақда «Вақф» фондининг матбуот хизмати хабар берди.

Шундан, закот маблағлари ҳисобидан 263 нафар муҳтож инсонларга 405 миллион 730 минг сўм улашилди. Мамлакат масжидларига 118 миллион сўмлик китоб тақдим этилди. Хайрия маблағлари ҳисобидан 173 миллион сўмлик озиқ-овқат маҳсулотлари кам таъминланган ва ногиронлиги бўлган шахсларга тарқатилди.

Диний таълим муассасалари талабаларининг тўлов-шартномалари, масжид, мадраса ва зиёратгоҳлар, руҳий касалликлар шифохонаси учун 440 миллион сўм атрофидаги маблағлар сарфланди.

Фонднинг 14 та ҳудудий филиаллари томонидан Рамазон ойи давомида қарийб 700 миллион сўмлик закот ва хайриялар 6 мингга яқин ҳақдор инсонларга етказилди.