Тошкентда 20 ёшли талабани уриб юбориб, ҳалок қилган ҳайдовчи 20 миллион сўм жарима эвазига озодликка чиқди

Тошкентда катта тезликда машина ҳайдаб келаётган ҳайдовчи пиёдалар ўтиш йўлагидан кетаётган 20 ёшли талабани уриб юборди. Талаба касалхонада ҳалок бўлди. Ҳайдовчига 20 миллион сўм жарима тўлаш жазоси юклатилди. Бу ҳақда «Новости Узбекистана» хабар берди.

Талабанинги исми Муҳаммад Раҳимов бўлиб, у Губкин номидаги Россия давлат нефть ва газ университетининг Тошкентдаги филиалида таҳсил олган. 2019 йил 11 февраль куни соат 8:30 да у университет қаршисидаги пиёдалар йўлакчасидан ўтаётган эди. Трассанинг 3 та йўлагидаги машиналар тўхтаб, пиёдаларни ўтказиб юборган. Аммо тўртинчи йўлакдан катта тезликда келаётган Cobalt автомобили тормоз беришга улгурмаган ва Муҳаммадни уриб юборган.

«Боламнинг соғ жойи қолмаган. Мияси, суяклари, оёқ-қўли синган. Тўққизинчи кун касалхонада ҳушига келмай жон берди», — дейди Муҳаммаднинг отаси Алишер Раҳимов.

Cobalt ҳайдовчиси 60 ёшли Нуғмон Содиқов аввал прокуратурада ишлаган, ҳозирда Андижондаги «Нур Зиё Фемид» хусусий адвокатлик идорасининг эгаси ҳисобланади. ЙТҲ содир бўлган жойда машинанинг тезлиги 50 км/с этиб белгиланган, аммо ҳайдовчи 80 км/с тезлик билан ҳаракатланган.

Талабанинг ота-онаси бахтсиз воқеа ҳақида университет деканидан хабар топган. Ўткинчи талабалар ва ўқитувчилар Муҳаммадга ёрдам беришга ҳаракат қилган. У ердан ўтиб кетаётган Мудофаа вазирлиги фелдшери ЙТҲни кўриб, тўхтаган ва «Тез ёрдам» келгунича Муҳаммадга биринчи тиббий ёрдам кўрсатган. Ҳайдовчи эса ҳеч қандай ҳаракат қилмаган.

Орадан 1,5 ой ўтгач Нуғмон Содиқов  маҳалла раиси ва ўз адвокати билан Муҳаммаднинг уйига келган. Уни таниган Муҳаммаднинг ота-онаси келганлардан уйдан чиқиб кетишини сўраган.

3 ой давом этган тергов ҳаракатларидан сўнг Мирзо Улуғбек суди 3 май куни Нуғмон Содиқовни Муҳаммаднинг ўлимида айбдор деб топган. ЖК 266-моддаси, 2-қисмига кўра, уни 7 йил муддатга озодликдан маҳрум қилиш керак эди. Аммо айбдорнинг ёши анча катталиги ҳисобга олиниб, ЖКнинг 50-моддасига кўра, жазо муддати қисқартирилган ва 4,5 йилга озодликдан маҳрум қилинган.

Аммо Нуғмон Содиқов  суд қароридан норози бўлиб, Тошкент шаҳар судига апелляция берган. 1 ойдан сўнг қайта суд ўтказилиб, Нуғмон Содиқовнинг ҳаракатлари эҳтиётсизлик оқибатида содир этилган деб топилди ва суд залининг ўзида озодликка чиқарилди. Суд 15 дақиқа давом этди. Муҳаммаднинг ота-онасига судда сўз берилмади. Айбдорга давлат ҳисобига 20 миллион сўм жарима тўлаш жазоси юклатилди.