Жиззах шаҳри, Юнусобод кўчасида яшовчи С.Каримов Ўзбекистон истеъмолчилар ҳуқуқларини ҳимоя қилиш жамиятлари федерациясига 1091 ишонч телефон орқали мурожаат қилди. Бу ҳақда ЎзА хабар берди.
У ўз мурожаатида электр энергиясидан 249 847 000 сўм қарздорлик ёзилганлиги бўйича смс хабар келганлиги, бу бўйича шаҳар электр таъминоти корхонасидан изоҳ сўраганида мурожаати эътиборсиз қолдирилганини билдирган.
Фуқаро 20 кун электр энергиясиз қолган. Истеъмолчи қайта-қайта мурожаат қилганидан сўнг электр таъминоти корхонаси МИБга, МИБ бўлса яна электр таъминоти корхонага мурожаат қилишини айтган. Икки орада истеъмолчи сарсон, салкам 250 миллион қарз ҳазилакам сумма эмас.
Мурожаат жамият мутахассислари томонидан ўрганилди ва истеъмолчига 249 847 000 сўм асоссиз қарз ёзилган бўлиб, аслида истеъмолчи электр энергиясидан олдиндан 252 000 ҳақдорлиги аниқланди. Истеъмолчининг мурожаати ижобий ҳал бўлди.
Таъминотчи корхона ичидаги «ўйинлар» биринчи марта эмас. Ўз ҳуқуқини билган истеъмолчилар тегишли ташкилотларга мурожаат қилади, аммо қанчадан-қанча фуқаролар бундай нореал қарздорликни тўлаётганликлари сир эмас.
Электр энергияси мутасаддилари ОАВ орқали ҳар сафар «чет эл тажрибасини ўрганяпмиз» деб айтади. Япония Энергетика вазири қишлоқда 20 дақиқа электр бўлмаганлиги учун аҳолидан расмий узр сўрайди. Биздагилар чет эл тажрибасидан мана шундай ишларни ўзига тажриба сифатида олса яхши бўларди.
Изоҳ (0)