Ўзбекистон Монополияга қарши курашиш қўмитасига The Coca-Cola Company’нинг Ўзбекистондаги ваколатхонасидан маҳаллий NMedov компанияси The Coca-Cola Company’га тегишли видеороликка «айнан ўхшаш» видеороликдан фойдаланаётгани ҳақида мурожаат тушган. Қўмита ушбу мурожаатни ўрганиб, унинг натижалари ҳақида ахборот берди.
Маълум бўлишича, NMedov ўзи ишлаб чиқарётган Панкиэ маҳсулотини реклама қилишда «Рақобат тўғрисида»ги қонуннинг 13-моддасини бузган, ўз навбатида The Coca-Cola Company’нинг муаллифлик ҳуқуқи бузилишига олиб келган. Аниқланишича, баҳсга сабаб бўлган видеоролик илк бор 2016 йилда намойиш этилган ва муаллифлик ҳуқуқи The Coca-Cola Company’га тегишли.
Қўмита «Рақобат тўғрисида»ги қонуннинг ноҳалол рақобат талабларига асосланган ҳолда NMedov компаниясига Панкиэ музқаймоғи билан боғлиқ реклама ролигини ишлаб чиқиш ва намойиш этиш билан боғлиқ ҳужжатлар ва маълумотларни тақдим этиш тўғрисида хабардор қилган.
Нмедов томонидан қўмитага тақдим этилган маълумотда, мазкур ҳолат бўйича жиддий ўрганиш ўтказилгани, натижада тушунмовчилик сабабли ушбу ҳолатга йўл қўйилгани маълум қилинган. NMedov’нинг видеоролиги телевидение тармоқлари, интернетдаги ижтимоий саҳифалардан олиб ташланди.
Изоҳ (0)