Украина ҳукумати Россияга қарши айрим товарларни етказиб беришни тақиқлаш ва махсус бож тўловларини жорий этиш кўзда тутилган янги иқтисодий санкцияларни жорий этди, деб хабар берди Meduza.
Қайд этилишча, Украина Вазирлар Маҳкамаси Россия ҳукумати қарорлари ва ҳаракатларига қарши акс чораларни жорий этди. Хусусан, Украинага саноат маҳсулотлари гуруҳи, масалан, цемент, шунингдек, минерал ўғитлар, қишлоқ хўжалик маҳсулотлари, транспорт воситаларини импорт қилишни тақиқлади.
Maxсус бож тўлови бошқа бож тўловларидан мустақил равишда 2019 йилнинг 1 августидан қўлланилади. Унинг қиймати импорт қилинувчи товарнинг фоизлардаги нисбатда ҳисобланади. Аниқ тўлов миқдори қанча бўлишига аниқлик киртилмаган.
Россия апрель ойида импорт қилиниши чекланган Украина товарлари рўйхатини кенгайтириб, унга нефть ва нефть маҳсулотларини ҳам киритган эди.
Украина 2016 йилдан бошлаб Россиядан турли товарлар, хусусан, гўшт, балиқ, сут ва қандолатчилик маҳсулотларини келтиришни чеклаган эди. Чеклов 2019 йилнинг 31 декабрига қадар амал қилади.