Ўзбекистоннинг собиқ давлат котиби Раҳим Ражабов Комилжон Шамсиддиновга берган интервьюсида мустақиллик йилларида мамлакат ерости бойликлари, яъни нефть, олтин ва газнинг ҳисоби қандай олингани ҳақида гапирди.
«Бир воқеани айтай. Мустақиликка эндигина бир ярим-икки йил чамаси бўлган эди. Мен Зарафшонга бордим: 10 ойда 10-15 тонна олтин кам қазиб олинган экан. Улар (яъни кон раҳбарлари) ‘отдан тушсаям, эгардан тушмаган’ вақтлар. Бизга бўйсунмаслик ҳолатлариям бор эди, ҳаммаси саботаж қилувчи, қулоқлари ана у ёққа (Москва томонга) қараган эди. Шулар билан масалани қаттиқ муҳокама қилдик. Мен ‘Олтин бизники, у аввал бизнинг хазинага тушади. Шундоқ бўлгач, унинг ҳисоб-китобини ҳам тўғрилаб қўйинглар. Агар сизлар – биз кетиб, ўзбеклар олтинни қандай қилиб қазиб олади, конларни қандоқ ишлатади, десангиз, адашасиз. У чиримайди. Қачон қазиб олишга қурбимиз йэтса, ўз кадрларимиз етишиб чиқса – қазиб оламиз. Унга қадар ер остида ётаверади’, дея қатъий айтганман», — дейди Раҳим Ражабов.
Журналистнинг «Қанча олтин қазиб олинарди?» деган саволига собиқ давлат котиби қуйидагича жавоб берди:
«Бошланиш даврларида йилига 50-60 тонна олинарди. Ҳозир 2-3 марта кўпайиб кетган. У пайтда биттагина завод, яъни ‘GMЗ-1’ бор эди, ҳозир шунақа заводдан учтаси ишлайди».
Раҳим Ражабов ўша даврда Ўзбекистон олтинлари кафолат сифатида, жаҳон банкларига қўйилгани ҳақида шундай дейди:
«Биласизми, шундай сирлар борки, уни 20 йилда, баъзиларини эса 25 йилда очиш мумкин. Уларни вақтидан олдин гапириб қўйиш – қонун олдида жавобгарлик. Тўғри, биламан, лекин уларни ошкор этиш вақти келгани йўқ. Бир нарсани айта оламанки, Ўзбекистон олтинлари – Англияда ҳам, Швейцарияда ҳам, ҳатто Америка банкларида ҳам бор».
Изоҳ (0)