Ўзбекистонда музей экспонатлари хатлов қилинмоқда
Вазирлар Маҳкамасининг 2019 йил 12 февралдаги режаси доирасида музей ашёлари ва коллекцияларини тўлиқ хатловдан ўтказиш тартиби ва муддатлари аниқ белгилаб олиниб, ишчи гуруҳи шакллантирилди. Бу ҳақда «Халқ сўзи» хабар берди.
Вазирлар Маҳкамасининг 2019 йил 12 февралда «Юртимизнинг қадимий ва бой тарихини ўрганиш, илмий-тадқиқот ишларини кучайтириш ҳамда уларни келажак авлодга етказиш, мамлакатимиз музейларида сақланаётган тарихий экспонатларни тўлиқ хатловдан ўтказиш бўйича чора-тадбирлар режаси» ишлаб чиқилди.
Миллий музей таркибига киритилган музей ашёлари ва музей коллекцияларини ҳисобга олиш ва сақлаш тартиби тўғрисидаги низомга асосан ўз таркибида 3000 тагача музей ашёлари ҳамда коллекциялари бўлган кичик музейлар фондидаги барча ашёлар ҳар йили, 3000 тадан кўп ашёларга эга бўлган музейларда хатлов ишлари ҳар икки йилда бир марта ўтказилиши белгиланди. Шунга кўра, мамлакатдаги музейларда сақланаётган ашё ва коллекцияларни хатловдан ўтказиш жадал олиб борилмоқда.
Бугунги кунда Ўзбекистон давлат санъат музейи, Ўзбекистон амалий санъат ва ҳунармандчилик тарихи давлат музейи, I.В.Савиский номидаги Қорақалпоғистон давлат санъат музейларида хатловдан ўтказиш ишлари якунланмоқда.
Шунингдек, республикадаги музейларда 2,4 миллионга яқин музей ашёлари ва коллекциялари мавжуд, ҳозирги кунда уларнинг 90 фоизининг электрон базаси яратилди. Термиз археология музейи, Ўзбекистон давлат табиат музейи, Наманган вилоят тарихи ва маданияти давлат музейи, Усмон Юсупов уй-музейи, Мухтор Ашрафий уй-музейи, Урганч суратлар галереяси, Шаҳрисабздаги Амир Темур номли моддий маданият тарихи музейлари каталогларининг электрон базаси тўлиқ якунланди.
Яна қўшимча тарзида маълум қилиш ўринлики, Маданият вазирлиги томонидан музейларни янада кенгроқ тарғиб қилиш, фаолиятини жамоатчиликка кўрсатиш, сайёҳлар учун жозибадорлигини ошириш мақсадида Ўзбекистон музейлари ягона порталини яратиш ишлари ҳам олиб борилмоқда.
