Бугун Ўзбекистон Хотин-қизлар қўмитаси ва Марказий сайлов комиссияси ўртасида ўзаро ҳамкорлик тўғрисидаги келишувни имзолаш маросими бўлиб ўтди. Бу ҳақда қўмита матбуот хизмати «Дарё»га маълум қилди.
Фото: Хотин-қизлар қўмитасиМамлакат тарихида илк бора имзоланган Мазкур келишув хотин-қизларнинг мамлакатда ўтказиладиган сайловларда иштирок этишда конституцион ҳуқуқларидан фойдаланишни таъминлаш мақсадида ўзаро ҳамкорлик такомиллаштирилишини кўзда тутади.
Шу нуқтаи назардан, хотин-қизлар сафидан депутатлар сонини кўпайтириш, номзодларни сайлов қонунчилигидан хабардорлиги ва ҳуқуқий саводхонлиги даражасини ошириш, хотин-қизларнинг сиёсий фаоллигини таъминлаш билан боғлиқ муаммоларни ўрганиш ҳамда уларнинг сайлов ҳуқуқларини кенгайтиришга қаратилган тавсияларни ишлаб чиқади ва амалга оширади.
Фото: Хотин-қизлар қўмитасиҲамкорлик доирасида сайловлар жараёнида аёлларнинг ижтимоий фаоллигини ошириш, сайлов соҳасидаги билимларини бойитиш, сайловолди ва сайлов жараёнларига хотин-қизларнинг кенг жалб қилинишига қаратилган ҳуқуқий ўқувлар, учрашувлар ва давра суҳбатлари ўтказилади.
Мазкур келишув Ўзбекистонда хотин-қизларнинг салоҳиятини янада ривожлантириш, етакчилик қобилиятини кучайтириш, сиёсатчи, раҳбар ва жамоат арбоблари сифатида ўзларини намоён қилиш ҳамда мамлакатда олиб борилаётган ижтимоий-сиёсий, иқтисодий, ахборот ва мафкуравий ислоҳотлар жараёнида уларнинг иштирокини кенгайтириш ва аҳоли фаровонлигини таъминлашда ўз самарасини беради.
