«У рақсга тушади, ғазал ва достон айтади». Халқаро бахшичилик фестивалининг 5 ёшли иштирокчиси билан интервью (фото ва видео)

Термизда халқаро бахшичилик фестивали давом этмоқда. Унда энг ёш иштирокчи — 5 ёшли Ғолибжон бахши ҳам қатнашмоқда.

Журналист Феруз Муҳаммад Ғолибжон ва унинг онаси Севара Темирова билан суҳбатлашди.

«Исмимни момом билан бобом қўйган, шунинг учун ҳар соҳада ғолиб бўлмоқчиман», дейди Ғолибжон Орипов.

Ўғлимнинг зеҳни ўткир, ёзишни ўргатинг, ўқишни ўргатинг дейди. Жуда қизиқувчан. Термиз шаҳридаги 15-мактабгача таълим муасассасига боради, боғчада ҳам энг фаоллардан. Навоийхонлик, Бобурхонлик кечаларида ғазаллар ёдлаб иштирок этади. Шеър айтиш, рақс тушишга ҳам қизиқади. Ғолибжоннинг тоғаси санъат соҳасида бўлгани учунми, ўғлимнинг ҳам санъатга қизиқиши баланд. Унинг орзуси келажакда Президент мактабига ўқишга кириб, аъло баҳолар билан тугатиб, келажакда юртга хизмат қиладиган ўғлон бўлиб етишиш.

Севара Темирова, Ғолибжон Ориповнинг онаси.

Ғолибжон дўмбира жўрлигида достондан парчалар айтиб берди. Ёд олган ғазалини айтиб берди. Хонанда Жаҳонгир Отажоновнинг «Қадди баланд» таронасига рақсга ҳам тушди.

Маълумот учун, Ғолибжон Орипов 2013 йил 29 сентябрда Музработ туманида туғилган. У халқаро  фестивалнинг энг ёш бахшиси сифатида кўпчилик эътиборида бўлиб турибди.