Шавкат Мирзиёев Намангандаги етакчи диагностика маркази фаолияти билан танишди

Шавкат Мирзиёев Наманган вилоятига ташрифи чоғида ANAМЕД диагностика маркази фаолияти билан танишди. Бу ҳақда Президент матбуот хизмати маълум қилди.

Нейрожарроҳлик, неврология, кардиология, урологияга ихтисослашган ушбу марказ General Electric, Siemens ва бошқа компанияларнинг илғор диагностика ускуналари билан жиҳозланган. Малакали кадрлар жамоаси шакллантирилган. Бу борада Буюк Британия, Япония, Россиядаги етакчи диагностика марказлари билан ҳамкорлик ўрнатилган. Бир гуруҳ шифокорлар ушбу мамлакатларда малака ошириб қайтган. Ҳиндистон ва Россиядан тажрибали шифокорлар ишга жалб этилган.

Ҳозир бу ерда ўттиздан ортиқ киши ишлайди. Шу ойда стационар ва физиотерапия бўлимлари фойдаланишга топширилиши билан яна элликдан зиёд янги иш жойи яратилади.

Давлат раҳбари касалликларни даволагандан кўра, уларнинг олдини олиш зарурлигини, тўғри ташхис қўйиш ва касалликларни эрта аниқлаш учун бундай диагностика марказлари муҳимлигини таъкидлади.

Шу ерда Президент Администрацияси ҳузуридаги Ахборот ва оммавий коммуникациялар агентлиги томонидан Наманган вилояти ахборот-кутубхона марказини модернизация қилиш ва китобхонлик маданиятини ошириш концепцияси тақдимоти ўтказилди. Унга мувофиқ, вилоятда яна 50 та маҳаллада кутубхона, 12 та замонавий кўчма китоб дўконлари барпо этиш, 4 та «Библиобус» фаолиятини йўлга қўйиш ражалаштирилган.

Шавкат Мирзиёев аҳолига китобларни қулай тарзда етказиб бериш, Наманганда яшаб ўтган атоқли аллома ва адибларнинг асарларини нашр этиш бўйича кўрсатмалар берди.

Президент Наманган шаҳрининг Юксалиш маҳалласи ҳудудида барпо этилаётган кўп қаватли уйлар ва ҳудудни ривожлантиришга оид лойиҳалар билан танишди.

Маҳалла ёнида 80 гектарлик кичик саноат зонаси ташкил этилиши, бу ерда 7 мингдан ортиқ иш ўрни яратилиши режалаштирилган.

Жанубий Корея билан ҳамкорликда ташкил этилаётган Hyundai автомобиль заводи ҳам шу ҳудудда барпо этилади.

Давлат раҳбари Наманган шаҳрини замонавий шаҳарсозлик меъёрлари асосида янада обод қилиш, аҳолига қулай шароит яратиш бўйича режалар, Асадулла Хўжаев кўчасидаги бўш турган бино ўрнида IT парк ташкил этиш лойиҳаси билан танишди.

Президент шаҳар марказида барпо этилаётган «Афсоналар водийси» боғи қурилиши билан ҳам танишди. Нафақат Марказий Осиё, балки жаҳонда ўхшаши кам бўладиган мазкур боғ вилоятнинг ташриф қоғозига айланади.

Шавкат Мирзиёев Наманган вилоятига ташрифини якунлаб, Тошкентга жўнаб кетди.