Жорий йилда эълон қилинадиган мактаблар рейтингида иштирок этадиган барча таълим муассасалари рўйхати маълум бўлди. Бу ҳақда Вазирлар Маҳкамаси ҳузуридаги Таълим сифатини назорат қилиш давлат инспекцияси «Халқ сўзи«га маълум қилди.
Унга кўра, 2019 йилги рейтингда республика ҳудуди бўйича жами 956 та мактаб танлаб олинди. Рўйхат инспекция томонидан эълон қилинган. Мактаблар рейтинги 3 та кўрсаткичлар (индикаторлар) бўйича тузиб чиқилади:
- 2-кўрсаткич:«9-синф ўқувчиларининг билим даражаси кўрсаткичи»;
- 3-кўрсаткич:«Олий ва биринчи тоифали ўқитувчилар улуши»;
- 4-кўрсаткич:«Ижтимоий сўров натижалари».
Рейтинг жараёнида 9-синф ўқувчилари она тили фанидан диктант (125-140 та сўз) ва математика фанидан 1 та масала ва 4 мисолдан иборат назорат иши топширади.
Ўзбекистон Республикаси Президентининг «Халқ таълимини бошқариш тизимини такомиллаштириш бўйича қўшимча чора-тадбирлар тўғрисида» 2018 йил 5 сентябрдаги ПФ-5538 сонли фармони билан Давлат инспекциясига умумтаълим муассасалари фаолияти самарадорлигини баҳоловчи мезонлар (рейтинг индикаторлари)ни тасдиқлаш, 2019 йил 1 январдан бошлаб туманлар ва шаҳарлар кесимида танлаш асосида умумтаълим муассасалари рейтингини тузиш, рейтинг якунларини оммавий ахборот воситаларида, Давлат инспекциясининг веб-сайтида кейинги ўқув йили бошланишидан кечиктирмай эълон қилиш вазифаси юклатилган.
Ушбу топшириқлар ижроси юзасидан 2019 йил 30 январь куни Давлат инспекцияси ва Халқ таълими вазирлигининг видеоселектор йиғилиши бўлиб ўтди. Йиғилишда жорий йилда рейтинг жараёнига жалб қилинадиган умумтаълим муассасаларини танлаб олиш, рейтингга оид маълумотлар базасини шакллантириш, таълим муассасаларида ижтимоий сўровлар ўтказиш, назорат ишлари ўтказиладиган фанлар ва назорат турлари белгилаб олинди.
Изоҳ (0)