Қатар Японияни мағлуб этиб, ўз тарихида илк бор Осиё чемпиони бўлди (видео)
1 февраль, жума куни футбол бўйича Осиё Кубоги—2019 мусобақасининг финал учрашуви бўлиб ўтди.
Унда Япония терма жамоаси Қатар термасига қарши мусобақа чемпионлиги учун кураш олиб борди.
Ўйиннинг 12-дақиқасида қатарлик Алмуаз Али Япония термаси дарвозасига «қайчи» услубида супер гол урди (1:0) ва мусобақадаги голлари сонини 9 тага етказди.
27-дақиқада эса Қатар термаси ярим ҳимоячиси Абдулазиз Ҳатим узоқдан зарба бериб, жамоасининг иккинчи голига муаллифлик қилди (2:0).
2-бўлимнинг 69-дақиқасида Такуми Минамино араблар дарвозасини ишғол қилиб, ҳисобни қисқартирди (2:1). 83-дақиқада ҳакам Равшан Эрматов томонидан Япония дарвозасига пенальти белгиланди. Акрам Афиф бундан унумли фойдаланди ва якуний нуқтани қўйди.
Шу тариқа Қатар термаси Японияни 3:1 ҳисобида таслим қилиб, ўз тарихида илк бор Осиё чемпионлигини қўлга киритди. Қайд этиш жоиз, учрашувни ўзбекистонлик ФИФА рефериси Равшан Эрматов бошқариб борди.
Осиё Кубоги—2019
1 февраль, жума
Финал баҳси
Япония—Қатар 1:3
Голлар: 0:1 — 12 Алмуаз Али, 0:2 — 27 Ҳатим, 1:2 — 69 Минамино, 1:3 — 83 Афиф.Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
