Наманган вилояти ҳокимлиги, вилоят хотин-қизлар қўмитаси, мудофаа ишлари бошқармаси ҳамда бошқа давлат ва жамоат ташкилотлари ҳамкорлигида Ёшлар марказида аскар оналари иштирокида тантанали маросим ўтказилди. Бу ҳақда ЎзА хабар бермоқда.
Тадбирга таклиф этилган, айни пайтда армия сафида йигитлик бурчини ўтаётган аскарларнинг оналарига иззат-икром кўрсатилиб, уларга ташаккурнома ва эсдалик совғалари топширилди.
— Ўғлим Мансуржон Навоий вилоятида йигитлик бурчини ўтамоқда, — дейди шундай оналардан бири М.Жўраева. — Ҳозир бу ерда фарзандим шаънига айтилган илиқ сўзлардан жуда тўлқинланиб кетдим. Ўғлим хизмат қилаётган ҳарбий қисм командирининг ташаккурномаси билан тақдирланишим кўнглимни кўтарди.
Вилоят ҳокимининг ўринбосари, хотин-қизлар қўмитаси раиси Иродахон Қўчқоровага кўра, бу каби тадбирлар нафақат ёшлар, балки ота-оналар учун ҳам катта рағбат вазифасини ўтайди.
Изоҳ (0)