Россия ҳукумати ўқитувчи ва шифокорларга совға олишни тақиқламайдиган бўлди
Россия бюджет ташкилотлари ходимларига совға бериш чекланиши шифокорлар ва ўқитувчиларга тааллуқли бўлмайди. Бу ҳақда мамлакат ҳукумати аппарати раҳбари ўринбосари Андрей Логиновнинг сўзларига асосланиб, Meduza хабар берди.
«Қонунчиликдаги чекловлар биз—амалдорлар учун киритилмоқда. Бироқ, айрим ҳолларда мана шундай иккиланишлар юзага келаётган бўлса фуқаролик кодекси эмас, умумий қонунчиликдаги матнни ўзгартириш таклифини киритамиз», — деб қўшимча қилди у.
Декабрь ойида ҳукумат бюджет ташкилотларида ишловчи ходимлар олиши мумкин бўлган совғалар турларига чеклов киритиш тўғрисидаги қонун лойиҳасини парламентга киритган эди.
Мамлакат меҳнат вазирлиги ўшанда қонунчиликдаги ўзгаришлар ўқитувчи ва шифокорларга ҳам тааллуқли бўлишини маълум қилганди.
Ҳозирги кунда Россияда шифокорлар ва маданият соҳаси ходимларига фуқаролик кодексининг 575-моддасига кўра қиймати уч минг рублдан ошадиган совға олиш тақиқланган.
