3 январь, пайшанба куни футбол бўйича Ла Лига 17-турининг кечиктирилган ўйинида «Реал» «Вильярреал» билан 2:2 ҳисобида дуранг қайд этди. Учрашувда мадридликлар футболчиси Гарет Бэйл жароҳатланди ва қисқа танаффус вақтида захирага олинди.
Бу Бэйлнинг «Қироллик клуби» сафидаги 22-жароҳати ҳисобланади, деб хабар беради Marca.
У 13 та ҳолатда соғлиғидаги муаммо туфайли майдонни эрта тарк этган. Умуман олганда, футболчи жароҳатлар сабаб Испания чемпионати баҳсларида 84 та учрашувни ўтказиб юборган.
Тиббий кўрик хулосасига кўра, 29 ёшли футболчи чап оёғининг тиззадан пастки қисмидаги мускулларини жароҳатлаб олган. Натижада уэльслик ҳужумчи 10-15 кун майдонга тушолмайди. У Испания чемпионатининг 18-турида «Реал Сосьедад» (6 январь), 19-тур баҳсида «Бетис»га (13 январь) қарши ўйинда жамоасига ёрдам бера олмайди.
Ушбу мавсумда Гарет Бэйл «Реал» сафида барча мусобақаларда 23 та ўйинда майдонга тушиб, 10 та гол урди ва 5 та голли узатма беришга муваффақ бўлди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)