Жиноят ишлар бўйича Оқдарё туман судида судья Илёс Дониёров раислигида Каттақўрғон туманида истиқомат қилувчи Н.Т.га нисбатан очилган жиноят иши кўриб чиқилди. Бу ҳақда «Kun.uz» хабар бермоқда.
Н.Т. — Интернетда машҳур бўлган аёл. У икки фарзанднинг онаси. Турмуш ўртоғи 2016 йили вафот этган. 2018 йил 3 июнь куни Каттақўрғон шаҳар Ички ишлар бўлими катта тезкор вакили Санъат Умаров томонидан таҳқирланиб, ечинтирилгани хабари жамоатчилик орасида катта резонанс келтириб чиқарганди. Санъат Умаровнинг хатти-ҳаракатларига ҳуқуқий баҳо берилиб, у суд ҳукми билан 6,5 йилга озодликдан маҳрум этилганди.
Судланувчи Н.Т. эса Жиноят кодексининг 127-моддаси 3-қисми (вояга етмаган шахсни жиноят қилишга жалб этиш) ва 169-моддаси 3-қисмининг «а» банди (такроран ёки хавфли рецидивист томонидан амалга оширилган ўғрилик) билан айбланди.
Аввалги суд мажлисларида 30 сентябрь куни ўғирлатган телефонлари ва бошқа нарсаларини қайтариб олган ҳамда етказилган моддий зарарлари қопланган жабрланувчилар — Саодат Эгамбердиева, Сожида Бўриева, Мухлисахон Нарзуллаева судланувчига нисбатан даъвоси йўқлигини билдирган.
19 декабрь куни суд мазкур жиноят ишини кўришни якунлаб, ҳукм ўқиди. Cудда сўнгги сўз берилганида Н.Т. барча 4 эпизод бўйича айбига иқрор бўлиб, зарарларни қоплаганини, жабрланувчиларнинг бирор эътирози йўқлигини таъкидлаб, бундай ишларни бошқа қайтармаслигини айтган ва суддан енгиллик сўраган.
Cудда Н.Т.га ҳукмлар мажмуи бўйича узил-кесил ўташ учун 4 йилга озодликдан чеклаш жазосини тайинлади.
Ҳукм ўқилгач, судланувчи Н.Т.журналистларга интервью берди. У қилмишидан пушаймонлигини, бу хатти-ҳаракатларни ортиқ такрорламасликни ваъда қилди. Суд ишни адолатли кўриб чиққани, вояга етмаган фарзандларининг ёлғиз боқувчиси, оғир касалга йўлиққанини ҳисобга олган судьяга, шунингдек, прокурор ва унинг манфаатларини ҳимоя қилган адвокат, унга нисбатан даъвосидан кечган жабрланувчиларнинг барчасига ташаккур билдирди.
Изоҳ (0)