Президент мактаби дастлаб Қорақалпоғистоннинг Нукус шаҳрида, сўнг мамлакатнинг бошқа ҳудудларида ҳам очилади. Бу ҳақда Халқ таълими вазири Шерзод Шерматов маълум қилди, дея хабар беради вазирлик ахборот хизмати.

Вазир соҳа мутасаддиларига мактабни ташкил этиш бўйича топшириқлар берди.

«Президент мактабларининг асосий мақсади мамлакатнинг ҳар бир вилоятида иқтидорли ёшларни аниқлаш ва уларнинг ривожланишига керакли шароитлар яратишдир», — деди Халқ таълими вазири. Унинг сўзларига кўра, мазкур мактаб битирувчилари келажакда мамлакат ривожланишига ўз ҳиссаларини қўшиши керак.

Вазирнинг айтишича, Президент мактаблари STEAM — Science (фан), Technology (технология), Engineering (муҳандислик), Art (санъат) ва Mathematics (математика)) фанларини ўқитишга ихтисослашган бўлади.

Яъни, Президент мактабларида математика, физика, кимё, биология ва ахборот технологиялари ҳамда хорижий тиллар чуқур ўргатилади.

«Президент мактабларида ўқувчиларни танлаш ва таълим сифатини таъминлаш учун уларни хорижлик мутахассислар бошқаради. Шу билан бирга, мактабга малакали хорижлик ҳамда маҳаллий педагоглар жалб этилади ва уларнинг фаолиятига керакли шарт-шароитлар яратилади», — деди Шерматов.

Вазирнинг қайд этишича, ҳозирда тегишли вазирлик ва идоралар томонидан Президент мактаблари фаолияти ва ўқувчиларни қабул қилиш масалаларини тартибга солувчи керакли меъёрий ҳужжатларни тайёрлаш бўйича ишлар бошланди. Бу ҳужжатлар ўқувчиларга қўйиладиган талаблар ва қабул қилиш жараёнини белгилаб беради.

«Фурсатдан фойдаланиб, хорижлик мутахассислар ва хорижда ишлаётган юртдошларни ушбу лойиҳада иштирок этиш ва Ўзбекистон таълим тизимини ривожлантиришга ҳисса қўшишга чақираман», — деди вазир.