13 ноябрь куни «Ёшлар ижодиёти» саройида Глобал тадбиркорлик ҳафталигининг очилиш маросими ташкил этилди. Бу ҳақда «Дарё» мухбири Мадина Нурман хабар берди.

Унда Ўзбекистон Республикаси Президентининг фан, таълим, соғлиқни сақлаш ва спорт масалалари бўйича давлат маслаҳатчиси Абдужаббор Абдувоҳидов, Глобал тадбиркорлик тармоғи вице-президенти Буке Чухадар, Савдо-саноат палатаси раиси Адҳам Икромов, Бандлик ва меҳнат муносабатлари вазири Шерзод Кудбиев, Ташқи савдо вазири Жамшид Хўжаев ва давлат ҳокимияти органларининг бошқа масъул вакиллари кириш сўзлари билан иштирок этди.

18 ноябргача давом этувчи ҳафталик Ўзбекистон ёшлар иттифоқи, Халқаро бизнес ва технологиялар ассоциацияси, Ўзбекистон Савдо-саноат палатаси ва бошқа ташкилотлар билан ҳамкорликда ташкил этилди.

Унда  машғулотлар, тақдимотлар, маҳорат сабоқлари, турли муҳокамалар, онлайн мулоқотлар, b2b форматдаги учрашувлар, теле-мулоқотлар бўлиб ўтади.

Ҳафталик давомида «Бизнес ва давлатнинг ўзаро мулоқоти», «Business Women’s Gap», «Тадбиркорлик экотизими», «Экотизим бўйича хориждаги тажриба», «Тошкент – келажак шаҳри», «Таълим – миллатнинг тараққиёт мезони сифатида», «Блокчейн», «Маркетинг», «Alternatus» майдончаси, «Туризм», «Стартаплар», «Кўчат ўтқаз!» каби мавзуларда тадбирлар, мулоқотлар ўтказилиши кўзда тутилган. Шунингдек, Бухоро, Самарқанд, Қарши шаҳарларида моҳир бизнесменлар иштирокида маҳорат дарслари ташкил этиш режалаштирилган.

Очилиш маросими якунида меҳмонлар рамзий қизил тасмани кесиб, расман ҳафталикни очиқ, деб эълон қилди.