Lion Air авиакомпаниясининг Boeing 737 йўловчи самолёти Жакарта аэопортидан ҳаво кўтарилганидан кўп ўтмай, ҳалокатга учради. Бу ҳақда «РИА Новости» хабар бермоқда.
Straits Times газетаси маълумотларига кўра, Жакартадан Индонезиянинг Банка оролидаги Панкалпинанг шаҳрига рейсни амалга ошираётан самолёт маҳаллий вақт билан 6:20 да (Тошкент вақти билан 4:20 да) ҳаво кўтарилиб, 6:33 да радарлардан йўқолган.
Самолётлар парвозини кузатиб борувчи FlightRadar24 ресурсининг хабар беришича, самолёт Ява оролининг ғарбий соҳиллари яқинидаги денгизга қулаган. Хабар беришларича, ҳозирги вақтда қидирув-қутқарув операцияси бошланган.
Lion Air — Индонезиянинг энг йирик хусусий авиакомпанияси бўлиб, у Индонезия, Сингапур, Вьетнам, Малайзия ва Саудия Арабистонининг 126 аэропортига парвозларни амалга оширади. Жакартадаги Сукарно Хатта аэропорти авиакомпаниянинг бош транзити хаби ҳисобланади.
Lion Air авиакомпанияси ўзининг Wings Air шуъбаси билан бирга Европа Иттифоқи мамлакатлари ҳаво кенгликларида парвоз қилиши тақиқланган авиаташувчилар рўйхатига киритилган.