Молия вазирлиги вазир ўринбосари лавозимига номзодлар учун танлов эълон қилди

Ўзбекистон Молия вазирлиги вазир ўринбосари лавозимига кадрлар заҳирасини шакллантириш бўйича танлов эълон қилди. Бу ҳақда бошқарма сайтига жойланган хабар асосида Spot хабар бермоқда.

Лавозимга бўлган асосий талаблар ва вазифалар:

• Молия, иқтисодиёт, солиқ ва банк йўналишларида олий маълумотга эга бўлиши (хорижий ва халқаро олий ўқув юртларида таҳсил олган номзодларга имтиёзлар берилади);
• Инглиз ва ўзбек тилларини мукаммал билиш (IELTS сертификатига эга бўлган (камида 6 балл) номзодлар маъқулланади);
• Компьютер саводхонлиги, жумладан Microsoft Word, Excel ва Power Point дастурларини билиши;
• Меҳнатсеварлик ва ўз вазифасига масъулият билан ёндашиш;
• Профессионал этикет, ҳамкасбларга ҳурмат билан қараш;
• Муомала ва музокара маданияти;
• Ўз фикр-мулоҳазаларини ҳамда таклифларини тақдим қила олиш қобилияти.

Инновацион ғоя ва креатив фикрлаш, янгича қараш ва интилиш билан ўзгаришлар қила олиш қобилияти, стратегик фикрлаш ва бошқарув қарорларини тезкор қабул қила олиш қобилиятига эга бўлган, ходимларни танлаш ва самарали бошқариш малакасига эга бўлган кишилар керак эканлиги таъкидланади.

Ходимларнинг ойлик маоши номзоднинг жорий иш ҳақи, малакаси ва иш тажрибасига асосан белгиланади.

Танлов жараёни 3 босқичда амалга оширилади: 12 октябрга қадар ишчи гуруҳи томонидан CV ва ёзилган иншолар ўрганиб чиқилади, 15 октябрь куни иккинчи босқичга ўтган номзодлар билан ўзбек ва инглиз тилларида суҳбат ўтказилади. 16 октябрь куни ишчи гуруҳ номзодларнинг балларини тўплаб, ҳар бир номзоднинг кучли ва кучсиз тарафларини муҳокама қилиб керакли ходимларни танлайди ва 3 кун муддатда номзодларга танлов натижалари тўғрисида маълумот беради.